Shillong, Nohprah 24: U Director ka tnad ka koit ka khiah u Dr Aman War u la pyntip ba mynta ka sngi kiba la test COVID-19 positive kala hiar sha ka 12 ngut, kine baroh ki dei na ka nongbah Shillong. Kiba dang shitom ha ka jylla baroh ki long 283 ngut.
La pyntip ruh kiba la ioh ia kane ka jingkoit ki long 28 ngut mynta ka sngi, East Khasi Hills 12, West Garo Hills 9, East Jaintia Hills 2, East Garo Hills 1, North Garo Hills 1, South Garo Hills 1, West Jaintia Hills 1, kiba la koit baroh ki long 12922 ngut.
Na ka liang jong ka tnad ka koit ka khiah la ong ba kala don ka jingpang thymmai ha United Kingdom, kumta la bthah ia baroh kito kiba la wan na katei ka ri ha kine ki lai taiew kiba la leit noh ki hap ban sumar ia lade ban peit bha ia ka koit ka khiah.
Ha ka juh ka por ka sorkar kala buh ia ki number phone jong ki ophisar ha baroh 11 tylli ki District jong ka jylla ba lada don kino kino kiba la wan na katei ka ri lada ki don kano kano ka jingsngewthuh ha ka met jong ki kin pyntip ha ki number kiba la ai. Ha ka khubor u SP News Agency kin peit ha ka khubor phareng ia ki number phone.
