Shillong, Nailar 20: Ka “Joint Action Committee” ki nongrep na ka thain Mawkynrew, Mawrengkneng bad Nongkrem mytna ka sngi kila leit ban ia kynduh ia u bah Himalaya Shangpliang MLA jong ka poarty Congress ha kaba kila ai ia ka dorbar khas ban pynpaw ia ki jingeh ki nongrep jhur na kitei ki thain.
U Bah Himalaya Shangpliang haba kren ha ki lat ptahai khubor u la ong ba na ka jingiakren bad ki nongrep ka long ba ki nongthied kila khniot dor palat haduh tang T.5.00 tyngka shikilo kaba ki nongrep tang kabai dawai ruh kam mih shuh.
U bah Himalaya u la ong ba un sa rah ia kane ka jingeh jong ki nongrep ban ia kren ha hapoh ka iing dorbar thawain ka jylla ha ka dorbar synrai kaban sa long ha u bnai Nailur, la ong ba ki nongrep nalor ba kila shah ktah na kane ka khlam COVID-19 naduh 2020 bad kane kala ktah haduh mynta ruh.
U Bah Himalaya u la ong ba ka sorkar kala kren ban buh ia kita ki iew dielang kum ha Smit, Umdingpun, Mawryngkneng hynrei kine ki iew kim don haduh mynta, ka jingbym don ia kine ki iew dielang kala buh ia ki nongrep ha ka jingeh ban die ia ki jhur.
La ong ba kumba ka long mynta ki jinghoar dor jong ki jhur ki long, Kubi, Sohsaw, Phan, kine kila hiar dor sha ba palat, na ka liang jong ka sorkar kala dei ban buh ia ka dor sorkar ia ki jhur ba ki nongrep kim nym shah khniot kumba ka long mynta, la ong ba kitei ki jaka ki dei kiba pynmih bun eh ki jhur.
U Bah Kansing wei na ki nongiarap ia ki nongrep na katei ka thain u la ong ba ka sorkar ka dei ban peit ia ki jingeh jong ki nongrep bad ka dei ban buh da ka dor sorkar ban im ki nongrep, u bah Kostan Nongspung president ka Joint Action Committee u la kyprad ia ki MLA bah Himalaya ban kren lem ia ka jingeh ki nongrep.
Ha kane ka sngi kala don ka jingiakynduh ki nongrep ka tei ka thain bad ki MLA ka Congress ha kaba kila ia phylliew jingmut ban pynsngew ia ka jingeh jong ki nongrep jhur ha MLA Hostel.
