Shillong, Nailar 12: Ka jingrakhe ainam da ka khusnam na ka bynta ka thohdur ba la tip kum ka “Crystal Gayle Memorial Award 2022” la pynlong ha Raj Bhavan Shillong iing sah u Lat ka jylla.
Ha kane ka rakhe ainam, u bah R V Warjri, u nongkit-tiensyiem barim jong ka Ri India sha kylleng ka pyrthei u la long u kongsan ha ryngkat u N Munish Singh, Zonal Director, Indian Council for Cultural Relations, Shillong bad Bah A Lakiang, Deputy Secretary to the Governor, Raj Bhavan Shillong kum ki symbud kongsan.
Kum ban kynmaw tympang ia ka kam jong u Bah R V Warjri ha ki Ri jong ka dewbah Europe, u la kren mardor ‘Ka Saiñkylla (Revolution) jong ki Ri Sepngi ka la kiew skong da ka khih mynsiem ha ka mattithaw (art movement) ka ba la kyrsoi da ka jingshitrhem bad len lade jong ki barikor, ki kaitor, ki myllung bad ki thohjer thohnam’.
Ha ka ba nam ia ki kam jong ka synjuk ki barikor, Riti Academy, u Bah Warjri u la kyntu, ‘Ka mattithaw ka dei ka ba snoh rdin bad ki jynthaw ha ka mariang ba ki paidbah ki dei ban tip la ka kamram ban pynneh pynsah bad ba ym dei ban tip tang kumno ban dawa ia la ka hok khlem da kitkhlieh ia la ka khyndew bad ka mariang ha la Ri lajong’.
Ia ka Khusnam Mattithaw ne Crystal Award 2022 for Excellence in Visual Arts la ioh pdiang da u Bah Phaibhakupar Kharlukhi halor ka jingtbit ba kynsai ha ka thohdur ka ba phalang ia ka jingim jong ki briew ha shnong ha thaw ia ka ba ym ju kham jia shuh ha ka juk mynta.
Ka jinjanai bad sani ha ka kam jong u ka la long u mawmer ban jop ia ka thong jong ka khusnam mattithaw ban kynmaw tympang ia ka samla Crystal Gayle ka ba la khlad naduh u snem 2017.
La ainam ia ka khusnam da u kongsan, Bah Mr R V Warjri, ha ryngkat u Bah N Munish Singh, Zonal Director, Indian Council for Cultural Relations, Shillong, Bah A Lakiang, Deputy Secretary to the Governor, Raj Bhavan Shillong bad Bah Raphael Warjri, Chief Creative Director, Riti Academy of Visual Arts. Ha kane ka sngi la rwai sngewnguh ruh da ka Dalariti Kharnaior ka ba dei ka para jong ka samla Crystal Gayle.
Ha ka ba kynmaw tympang ia ka samla Crystal Gayle, u Bah N Munish Singh, Zonal Director, Indian Council for Cultural Relations, Shillong u la kren myllung shaphang ka jingshem jong u ha ka kam sawangka ka ba la shon shab ha ka dohnud jong u.
Ha katei ka sngi rakhe ainam Khusnam Mattithaw u Bah Raphael Warjri u la pynpaw ka jingsngewnguh ia u Lat, Satya Pal Malik, u ba wat la um shym lah ban don ryngkat na ka daw ba u ñiuñ ka met, hynrei u la shah sngewbha ban rakhe ha la ka paki dulan bad ka jingrakhe ka long ka ba phuh baphieng. Kumta ki para dkhot jong ka synjuk ki barikor Riti Academy ki la phah ka khubor kitbok kitrwiang ia u Lat ba un koit un khiah noh shen.
U Bah Warjri u la pynban ba ka jylla Meghalaya ka donkam ia ka shlem hikai thohdur ka ba paka na ka bynta jong ki samla ka jylla bad u la pynban shuh shuh ba ka long artat katkum ka phangpdeng jong ka Kpait-saiñ-kam Shityllup-Ri ha ka Pule Dangle (National Education Policy) jong ka Ri India.
