Shillong, Nohprah 11: Ka Nongkhnum Festival Organising Committee kala pynbna paidbah ba kin pynlong ia ka ta tamasa bad ha kane ka kynti kaba mynta ki jer kyrteng ia kane ka tamasa “Kirong ka Nongkhum” kane ka dei kaba la juh long teng man u snem.
Haba kren haki nongthoh khubor mynta ka sngi u Dr Lumbor Mawsor la ong ba kane ka tamasa ka dei ka sien kaba saw, hynrei mynshuwa la leh da ki bor jong ka District Administration, hynrei ha kane ka kynti kaba mynta la aiti noh sha ka seng ban pyniaid ia kane ka tamasa.
Kane ka kynhun kaba pyniaid mynta ki don ar tylli ki seng ka Apple Society Nongstoin bad ka Pyndengrei Sport bad Social Cultural Club, ka phang pdeng jong kane ka tamasa kaba kila buh mynta ka long “Na ka bynta ka mariang, ka jingkyrmen, na ka bynta ka jingim”.
Ha kane ka tamsa kaba nyngkong eh ka long ban pyninam iala ki jong ki riti dustur, kin don ka jingiakop ha ka riam tynrai bad la khot ia ki hima kiba don ha ki ar tylli ki District ka WKH District bad ka SWKH District, kop shad, phwar bad iathuh khanatang da kaba ia treillang bad ka Khasi Aurthor Society.
Kan ruh ka jingiakop halor ki jingtem khasi tynrai, ka jingrwai ka lah ban long kano kano tang ki jingtem ki dei ban long ki tiar tem tynrai. Nalor kine ki don ruh ki nongtem bala paw jong ka jylla kum ka Umphohliew, Khlieh Creative Society, Na mynor bad kiwei kiwei bad bun ki nongrwai hi kiba na kane ka jylla.
Kan don ruh ki jingialehkai ba bun jaid kum ka jingianiah kali, ki jingialehkai ha rud shyiap, ka bai rung ba kin wan sha kane ka tamasa. Kiba wan sha kane ka tamasa kin hap ban buh ia ki kali sha shiliang surok bad kin hap ban iaid kjat. Kane ka tamasa kan long ar sngi ha ka 14 bad 15 tarik mynta u bnai.
