Shillong, Jylliew 09: Ka sorkar jylla mynta ka sngi ka 9 tarik jylliew ka la pynshai paidbah ia ka jingjia halor ka jingkhlad noh u nongwan jngohkai pyrthei ba na Indore u Raja Raghuvanshi ha Sohra.
U bah Prestone Tynsong myntri ka tnad kam pohïing (Home) ha ka jingiadon lang ki pulit ba kynthup ia u SP ka East Khasi Hills bad kiwei ki ophisar pulit, haba kren sha ki lad pathai khubor mynta ka sngi u la ong ba ki pulit ki la ioh kem ia 4 ngut kiba donkti ban pyniap ia u Raja Raghuvanshi u lok jong ka Sonam Raghuvanshi hadien ba ka Sonam ka la pyndem hi ha ki pulit jong ka Uttar Pradesh.
U ong ka long kaba sngewtynnad hadien ba ka jylla ka la shah kynthoh ha ki briew kiba nabar shaphang ka jinglong ki briew ha Sohra kaba la pyntieng pynsmiej ia kiwei pat ki nongwan jngohkai ba wan nabar bad ki ba na india, kiba la sah umdum, hynrei mynta ki jingshisha ki la paw lut halor ka jingjia ia u Raja Raghuvanshi.
U la bynrap ia ki 4 ngut ryngkat bad ka Sonam Raghuvanshi kin ngat ha ka aiñ bad ki pulit kin wan ialam ia ki sha Meghalaya ban tohkit bniah halor ka jingiap u Raja Raghuvanshi.
U bah Prestone u la ai khublei ia ki paitbah ka jylla naduh ki Pulit, ki NDRF, SDRF, SOT, SIT, NESAC, ki nongkiewlum na West Jaintia bad kumjuh ki paidbah ka thaiñ Sohra, ki Dorbar shnong bad kiwei kiwei ki ba la ialeh shitom ban wad ia kine arngut ki ba jah.
U bah Prestone Tynsong u la ong ba ka jingkyrpad jong ka sorkar ia baroh ki paitbah ka jylla ban ai mynsiem shuh shuh ia ki pulit ka jylla, kumjuh ban ai mynsiem kumba iohi ha kine ki kyndiat sngi ka jingshim byntalang ki paidbah, ki nongshong shnong, ka thain Sohra ka Administration, ka Civil Sub Division Sohra ha kaba khatduh la ioh ban kheit ia u soh bad da kane ka jinglap ia ka jingshisha baroh kan weng lut ia baroh ki jingartatien kiba don ha ki nongwan jngohkai ki paitbah ia ka jingitynnad ka jylla Meghalaya.
