Shillong, Naiwieng 09: U Bah Titosstarwell Chyne CEM jong ka KHADC mynta ka sngi u la kyntu ba ia ki jingtrei kiba ia dei bad ki kam pynroi dei ban pyndep ha ka por ba biang ban dup lah ban ai ia ka syrnot bala pyndep ia ka jingtrei sha ki bor ba dei ban phah.
La iathuh ba katkum ki kyndon kiba la bthah da ka 15th Finance Commission jong ka sorkar pdeng la dep ban plie ia ka “PMFS Account” ha kaba la pan ruh ia ka Digital Signature jong u CEM bad la pynkhreh ruh ia ka L.G Code na ka bynta ki shnong.
U CEM jong ka KHADC u la ong ba ia ka pisa lyngba ka 15th Finance Commission ym pat ioh namar ba ki dang don bun ki jingeh khamtam eh na ka tnad pla pisa jong ka sorkar pdeng kin phah noh lyngba ka tnad pynroi nongkyndong.
La iathuh hapoh ka iing dorbar ba ia ki District Council la niew kum ki bynta ba pyntrei ha ki nongkyndong namar ka sorkar pdeng kam pat ithuh ia ki dorbar shnong, halor kane ka bynta ka sorkar Meghalaya lyngba ka tnad pynroi nongkyndong kala phah ia ka jingpynshai sha ka sorkar pdeng ba ha Meghalaya kam don kam ia ka Panchayat.
Na ka liang jong u CEM jong ka KHADC u la ai khublei ia u MDC ka Mawhati u bah Charles Marngar bala wan rah ia kane ka jingkylli wat la ka jubab nyngkong da ka EM ba dei peit ia ka tnad khlaw, hynrei haba jubab ka EM ka mut ba jubab ka EC.
