Shillong, Naiwieng 02: Ka Khasi Authors’ Society ryngkat bad ka Khasi Department jong ka salonsari North Eastern Hill University ki la ia kynduh bad u Dr W R Kharlukhi, dkhot ka Dorbar Thawaiñ Rajya Sabha ban iatai halor ka jingpyrshang ban kynthup ia ka ktien Khasi ha ka Khyrnit Baphra jong ka Riti Synshar ka Ri India.
Ka jingithuh ia ka ktien Khasi ka la sahteng da ki phew snem, wat lada la dep ithuh ha jylla ia baroh ar tylli ki ktien Khasi bad Garo kum ki ktien pdeng naduh ka snem 2005 bad dang ha ka snem ba la lah ka Dorbar Thawaiñ Jylla ka la dep kubur ia ka rai halor ka jingdawa ban ithuh noh ia ka ktien Khasi bad Garo ha ka Khyrnit Baphra jong ka Riti Synshar.
U Dr W R Kharlukhi u la pynpaw ba donkam ban durut da ki buit bad ki lynti ba biang, wat lada dei ban synrop bad ki kher ki mer jong ka sorkar kmie na ka bynta ban poi sha ka thong.
Ha ka sien shong ban wan jong ka Dorbar Thawaiñ Rajya Sabha u MP u la iathuh ba un sa wanrah ban kren bad iatai ha ka pali jong ka zero hour notice. U Dr Kharlukhi u la ithuh shuh shuh ruh ba ka kam ba iadei bad ka Inner Line Permit bad ka ktien Khasi and Garo Language kin long ki mat ba kongsan ban iatai.
Lah ban kynthoh ba kane ka kam ka la sahteng da ki phew snem naduh ka snem 1978, wat lada ka ktien Khasi ka la biang pura katkum ki jingdawa na ka Shnat Korbar-Ri jong ka Sorkar Kmie ka ba kynthup ruh ia ka Department of Official Languages; bad don lei lei ki bynta ba ka ktien Khasi ka la palt liam ia ki kyndon ba la buh na ka bynta ban ioh jingithuh ha ka Khyrnit Baphra jong ka Riti Synshar jong ka Ri India.
Lah da ki phew snem ki kynrem lyndan ba kynsai kum u Prof G G Swell, Mr Hoover Hynniewta, Hoping Stone Lyngdoh, Dr B R Kharlukhi, P Ripple Kyndiah ter ter ki la trei borbah ha kane ka liang, hynrei haduh mynta ka jubab na ka Shnat Korbar-Ri jong ka Sorkar Kmie ka dang sah kumjuh ba dang dei ban dang jurip shuh shuh ryngkat bad kiwei pat ki ktien na kylleng ka Ri India.
