Shillong, Nalur 06: Mynta ka sngi ki lai ngut ki Chief Executive Member jong ki lai tylli ki District Council ha ka jylla, kila ia kynduh ia u myntri rangbah ka jylla bad ha kane ka jingiakynduh kila ia kren ban bishar bniah biang ia ka rukom trei kam jong ki District Council ha ka jylla.
U Bah HS Shylla CEM jong ka KHADC haba kren ha ki lad pathai khubor ha dien ka jingiakynduh ia u myntri rangbah ka jylla u la ong ba kane ka jingiakynduh ka dei tang ka jingiakynduh ban ia ai khublei nama ia ki lai tylli ki District Council ha ka jylla la bat ia ka bor synshar da ka seng NPP.
Ha kane ka jingiakynduh baroh lai ngut ki CEM, u Bah Madonbai Rymbai jong ka JHADC bad u Dipul R Marak GHADC, kila pynsngew ba kaei kaba kila ia kren ha kane ka sngi ka long tang kawei ba la don kam ban bishar bniah biang ia ka jingtrei kam jong ki District Council ha ka jylla.
Haba ia dei bad kane ka jingai jingmut jong kine ki lai ngut ki CEM, u Bah Shylla u la ong ba na ka liang jong u myntri rangbah ka jylla u la kular ban sa ia kynduh biang bad ki CEM jong ki lai tylli ki District Council ban ia kren ia kane ka jingai jingmut ha dien ka dorbar synrai jong ka jylla.
Ha kane ka jingiakynduh ia u Conrad, la ia kren ruh halor ka rai jong ka iing bihsar jong ka Meghalaya High Court 1993 kaba ong ba ia ka bhah kaba mih na ki marpoh khyndew ia kaba la niew ba ki dei ki ‘Major Minerals’ ka bhah ka dei ban long ha ka jingiabhah 40: 60 ka mut ka sorkar jylla kan ioh 40 bad ki District Council ki dei ban ioh 60.
Haba jubab ia ki jingkylli halor ka Lineage Bill jong ka KHADC, la kala don ne em ka jingiakren ha kane ka jingiakynduh, u Bah Shylla u ong ba kim shym ia kren ei ei ia kane ka bynta mynta ka sngi.
U CEM jong ka JHADC u Bah Madonbai Rymbai u la ong ba ka JHADC ka dang pynkhreh mynta ban wanrah ia kane ka Bill hapoh jong ka iing dorbar jong ka JHADC bad ha dien ba kila dep ban pynkhreh kin sa pass ia ka Bill kum jong ka KHADC.
U CEM jong ka GHADC, u Dipul R Marak u la ong ba ka GHADC kala dep pass ia kane ka bill ha ka 29th Lber 2017, ban khang ia ki kynthei Garo ban ioh lok da u bym dei Garo, hynrei u myntri rangbah ba rim ka jylla u Dr Mukul Sangma khlem da phah sha u Lat ka jylla u la pynphai noh ia ka Bill sha GHADC.
U CEM jong ka GHADC, u la ong ba kin sa wanrah biang ia kane ka bill sha ka iing dorbar ban pass biang ia ka. Ha dien ba kila pass biang ia ka Bill kin sa phah sha ka sorkar ban ioh ia ka jingmyntur jong u Lat ba kan logn ain.
