Shillong, Lber 11: Mynta ka sngi u myntri rangbah ka jylla u Conrad K Sangma u la ia kynduh ia ki nongialam jong ka Khasi Student’s Union ha ka jingiadon lang u symbut myntri rangbah ka jylla u bah Prestone Tynsong ban ia kren halor ka jingsngew khia jong ka seng ha kaba ia dei bad ka Meghalaya State Investment Promotion & Facilitation Act, 2024.
Kane ka ain, kaba la pynlong ai ha ka Lber 2024, ka thmu ban khring ia ka jingwan seng kam h kane ka jylla Meghalaya. Halor ka jingpynsngew kaba ki paidbah nongshong shnong kila buh ia ka jingkylli, ka sorkar kala tyrwa ban wan rah ia ka jingpynkylla ban pynthikna ba kane ka ain kan nym ktah ia ki kyndon jong ka ain ka Meghalaya Transfer of Land (Regulation) Act, 1971 lane ba kan nym iaid lait na ki District Council.
Kane ka jingpynkhreh ban wanrah ia ka jingkylla ka long ban pynthikna ba kane ka ain kan nym pyntlot ia ka Meghalaya Transfer of Land (Regulation) Act, 1971, kane ka jingthmu ban wan rah ia ka jingpynkylla kan nym iaid lait ia ki bor jong ki District Council, ban iada ia ki samla ki trai jylla ban ioh kam 90% ha ki kam Non-Managerial bad 50% ha ki kam ha ka kyrdan Managerial.
Ha kane ka jingiakren u myntri rangbah ka jylla u la iathuh shai ba kane ka jingthmu ban wanrah ia ka jingkylla ka long ban pynrung ha ka ain ia ka jingsngew jong ki paidbah nongshong shnong ka jylla ban pynthikna ba kane ka ain kan pynioh nong ia ki trai jylla bad ban ai ka jingiada ia ki trai jylla.
La ong ba ka sorkar kan dang iaid bteng ia ka jingiakren bad ki seng bhlang, kynthup ia ki khlieh nongsynshar, ki paidbah ban pynthikna ba kane kan long na ka bynta ka jingmyntoi ki paidbah bad ban pynthikna ban iada ia ka hok jong ki trai muluk ka jylla.
“Kum ka sorkar ngi long kiba la kut jingmut ba kano kano kaba kin leh kan long na ka bynta ka jingmyntoi ki paidbah ka jylla, ka jingthmu ka jong ngi ba lyngbah kane ka ain ban khring ia ki nongwan bei pisa, lah ban khring ia ki nongwan bei pisa ban seng kam, bad kane kan iarap ha kaba ia dei bad ka ioh kam ioh jam ki birew jong ngi bad kan iarap ban kyntiew ia ka roi ka por ka jylla” la pynthikna u myntri rangbah ka jylla.
