Shillong, Naitung 17: Mynta ka sngi ka sorkar Meghalaya bad ka IIM Shillong kila ia soi ia ka soskular ban ia treilang ban wan tah ia ka jingkylla ha ka imlang sahlang ka ban long ruh sha bar ka pule puthi, ha kane ka jingiasoi la sakhi lang da u myntri rangbah ka jylla u Conrad K Sangma, u shongknor ka BOG, IIM Shillong u Kumar Bajoria u Director ka IIM Shillong u D.P Goyal bad Secretary Planning, ka sorkar Meghalaya u bah Cyril D Diengdoh.
Ha ka jingkren jong u myntri rangbah ka jylla u Conrad K Sangma u la ong ba kane ka jingiasoi ia ka soskular ha kane ka sngi kaba khraw kaba ka jylla ka rakhe ia ka jingdap 189 snem ka jingkhlad u Syiem Tirot Sing nongialeh laidluid bad kane ka dei ka sngi ka ka sorkar jylla ka kwah ban ia treilang bad ka IIM Shillong.
La ong ba kane ka Soskular ka lon ban pynurlong ia ka jingpyntrei kam ia ka Chief Miniter’s E-Challenge Business Plan bad kiba ia shim bynta ha kane ka jingiakhun ki don 2000 ngut bad na kine la jied 100 ngut bad ka sorkar ka aibaiseng 10 lak tyngka ban pyntrei kam ia kata ka rukom pyrkhat thymmai ia kane la pynshlur lyngba ki jingialang ha ki Kolej.
La ong ba ka jingthmu jong ka sorkar hi ka long ban kyntiew ia ka ioh ka kot jong ka jylla da ka jingsngewthuh bad jingtip bad ki rukom pyrkhat kiba thymmai bad kum juh kumno ban tip ha kaba ia dei bad ka jingsiew ia ki khajna bad ka sorkar ka ialeh ban poi sha kata ka thong.
Kane ka soskular ka long ban ai jinghikai ia ki nongtrei ka sorkar jylla bad ia ki nongtrei jong ki District Council namar ki District Council ki dei ki bynta kiba kongsan ha kane ka jylla Meghalaya namar ka jinglong trai ia ka khyndew dei ki briew bad kane ka die ka dustur ha kane ka jylla. Kane ka kynthup ia ka jingpyntrei ia ki kam pynroi.
