Jowai, Nailar 08: Ka Dorbar Shnong Chilliangraij, Jowai ryngkat ka jingïatreilang bad ka tnad Forest Wild 
Life, Division Jaiñtia Hills District, shi bynta ban ïada ïa ka jingdon ki mrad ki mreng bad ki sim ki doh kumjuh ruh ki khlaw ki btab ha ki khlaw ka nongbah Jowai kiba don ha shi lynter jong ka wah Myntdu mynta ka sngi kila leit ban buh da ki Sign-Board ne ki kyndon aiñ jingmana naduh thwei Moopiah haduh ka khlaw kaba don hajan ka wah Ram pyrthai jong ka Wah Myntdu.
Hashwa ban buh ïa ki Signboard la pynlong ïa ka jingïalang ba la pynïaid da u samla Orilan Shylla Assistant General Secretary, la ïoh ruh ka jingkren na u Waheh Shnong ma D. Pde bad na ka kong H. Lato DFO, Wildlife Division Jaiñtia Hills District.
U Waheh Shnong ma D. Pde ula ong ka shnong Chilliangraij, Jowai kadei kawei na ki shnong kaba la ker tawiar ïa ka da ki khlaw ki btab ki wah duid jong ki bynta ka wah myntdu, da kaba u ong ruh naduh ki por mynshwa hapoh kine ki khlaw jong ka shnong ki sim bad ki mrad ba bun jait ki ju wan dem ha kine ki bynta jong ka khlaw.
Na ka liang ka DFO Wildlife ka kong H. Lato haba kren ka ai ka jingïaroh ïa ka Dorbar Shnong Chilliang Raij kaba la shim khia ïa kane ka bynta bad kala kyntu ïa kiwei de ki dong khamtam kiba don hajan ka wah Myntdu ba ki ïasnohkti lang ban ïada ïa ki khlaw ki btab khang ba ki mraw kin ïoh jaka ban sah da kaba shngaiñ.
La ong kumba ka long mynta la iohi ba don ruh ki Tngaw iong khmat ne kiba latipkum ki Capped Langur kiba la wan ban sah ha kine ki khlaw jong jong ka shnong Jowai, kala ba ka jingdon kum kine ki jait mrad ka ngah pynkha ne pyroi ia ki khlaw namar hadien ba ki la dep bam ia ki soh ki pynhap ia ki shyieng soh ne ki symbai sha khyndew.
Ka la ong ka jongdon jong ki sim ki doh ka pyni tynnad shibun ia ki sawdong saw kun jong ka mariang bad ka kyntu ia baroh ban iasnoh kti lang ban ai ka jingiada ban pynneh pynsah ia ki mrad bad ia ki khlaw ki btab.
Ka Shnong Chiliangraij, Jowai bad ka Forest Wild Life, Division da ka mynsiem ban pynneh pynsah bad ban ïada ïa ka jingitynnad ka mariang bad ka jingdon jong ki mrad khlaw kum ki shrieh kiba la wan shong ha kine ki khlaw mynta ka sngi ki la leit buh ïa kitei ki signboard na ka bynta ban ai jinghikai ïa ki paidbah halor ka jingkordor jong ka mariang.
