Shillong, Nailar 13: Hadien ba la mih ha ki lad pathai khubor ha kine ki khyndiat sngi ba la dep ba,kumba 36 tylli ki long ing kim treh shim khaw ration na u nongdie khaw uba shu thung bad kam hi kum u nong sam khaw ha shnong Kongthong,ki bor ba dei peit ia u khaw ration na ophis u SDO civil na Sohra ki la hiar mynta ka sngi, sha shnong Kongthong ban leit sam hi noh ia u khaw ration sha kitei ki longing ba shah pynduh khaw.
Ia utei u khaw la sam sha baroh ki longing kiba dei hok ban ioh ha ka dor sorkar kaba long Rs3/shi kg.Don bun ki longing kiba ioh da ki 3/4 quintal kawei kawei ka long ing namar ka office ka sam lut ia baroh kito ki bnai ba shah pynduh khaw naduh u bnai January ter ter haduh ki bnai lockdown ruh, kata, haduh u Naitung 2020 ei ei.
Katkum ka jingiathuh ki trai shnong na Kongthong,ha kaba nyngkong eh, ki nongwan sam khaw na office ka supply Sohra Civil Sub Division ki la theh bad khleh lang da u khaw uba la pyut ne sniew ban ai sha ki paidbah.Hynrei,ki paidbah ki pyrshah ia kata. Hadien kata,ka la mih ka jingiakren bad ia pyni nia bad katto katne ngut ki riew rangbah bad longkmie,,bad ha kaba khaduh,ki nongwan sam khaw na Sohra ki la kohnguh bad mynjur noh ban sam bad ban ai da u khaw uba bha uba ki paidbah ki ihun bad i biang ban bam.
Kane ka jingsam khaw mynta ka sngi ka iai bteng haduh da miet bad kat haduh ba thoh ia kane ka khubor ruh,ka jingsam khaw ka dang iaid shaid shaid ha shnong Kongthong. Na ka liang ki longing ba shah pynduh khaw ration lem bad ki paidbah nongshong shnong ka shnong Kongthong ki la pynpaw ka jingsngewhun bad jingsngewnguh -sngew burom ia ki bor sorkar naduh ka office SDO civil ka Sohra Sub Division.
Kum juh ia ka ophis jong ka Deputy Commissioner(supply),East Khasi Hills,ka Dept jong jong ka sorkar Meghalaya kiba la kloi lem ban shim khia bad iarap lem wut wut ban pynioh khaw biang khamtam ha kum kine ki por ba ban ka jingjynjar ka jingsuhsat ba ka sorkar ka pynjari da ka lockdown mynta la bun bun bnai.
Ki nong shong shnong ka Kingthong ki khmih lynti ruh ba ki bor sorkar kin lah noh ban pynbeit syndon ia ka kam sam khaw ration ha Kongthong khnang ban wan rah biang ia ka shongsuk shong sain bad ka roi ka par hapoh shnong poh thaw.
