Shillong, Iaiong 29: Ka jingwan rung ki spah ngud ki pulit hapoh ka NEHU, kaba la pynkyndit ym tang ia ki khynnah pule hynrei ia ki bun balang, halor kane ngi la ioh ban iakren ia u PRO ka NEHU u bah Davidson Pyngrope u ba la ong ba kane ka jingleh ki pulit ka la pyn syier ia ki samla pule ha kane ka skulbah.
U bah Davidson Pyngrope u la pynpaw ba kane ka jingwanrung ki pulit hapoh ka NEHU compound na ka liang ka Administrative bad ka ophis jong ka Vice-Chancellor kim don jingtip eiei halor kano ka nongrim ba ki wan ban rung hapoh ka compound.
U bah Davidson Pyngrope u la pynpaw ba hadien ba ki ophisar ka University ki leit ban iakren ia ki magistrates bad ki heh pulit. ki ophisar ka NEHU ki sa tip ba dei na ka jingujor na u Dr Alok Singh ha ka tnad pulit, ba u la kynoh ba u shah ktah kti ha u nongialam ka NEHUSU. Ba dei na ka daw ba u Dr Alok Singh u pan security.
U Davidson Pyngrope u la pyntip ba mar ia tip ia kane ka Prof incharge S.M Sungoh ka la phah jingthoh lyngba ka emails ha ka ophis ka DC bad ka ophis ka DGP ban kyrpad ban weng noh ia ki pulit bad ki CRPF na ka skul bah NEHU, khnang ba kan nym don kano kano ka jingjia na kane ka jingwan jongki hapoh ka skul bah. Hynrei katto katne por kham hadien la weng noh ia kine arms force bad ki pult napoh ka skul bah hynin ka sngi.
Halor ka jingshah kem u samla Sandy Sohtun u ba dei u president ka NEHUSU ki nongialam ka NEHUSU ki la pynlong ruh ka jingïakhih kaba jai jai mynta ka sngi ka 29 tarik ïaiong 2025 ha khmat ka building ka Central Library NEHU ha kaba ki la rah ha ryngkat ki lama iong bad ki jingthoh ba pynrem ia kane ka jingleh ka tnad pulit bad bud sa ka jingiaid rali kaba la pynkut ha gate 2 ka skulbah ha ba ha katei ka jaka ki pynlong sa ka signature campaign.
Haba ioh jing kren na ki nongialam ka NEHUSU ba la ialam kane ka jingiakhih ki la pynrem jur ia kane ka jingleh ka sorkar ban phah kem u nongialam ka NEHUSU. Ki la ong ba ka jingkem ia u samla Sandy Sohtun ka dei tang ban pyntroin ia ka jingiakhih pyrshah ia u Vice-Chancellor Shukla.
“Hoid ngi tip shai ba u Shukla um don shuh hapoh NEHU, hynrei ngi tip shai ba u dang thrang dik dik ban ioh wan biang hapoh ka skulbah bad u dang iai wat da kumno ban iohlad ban rung biang” .
Ki la kynoh ruh ba kane ka jingkem ia u samla Sandy Sohtun ka dei tang ka buit poh jong u VC Shukla bad ka jingdonkti lang ki katto katne ki nonghikai ban pharep ia ki samla pule, ka seng ki samla pule ka NEHUSU bad ka KSU NEHU Unit ki pyrneem jur ia kane.
