The Prime Minister, Shri Narendra Modi addressing at the inauguration and foundation stone laying ceremony of key projects of the Power and Urban sector in Kerala, via video conferencing, in New Delhi on February 19, 2021.
New Delhi, Naitung 13: U Myntri Rangbah duh ka ri, u Narendra Modi mynta ka sngi u la iakren bad ki Myntri Rangbah jong ki jylla ka thain shatei lammihngi halor ka jinglong jingman ka khlam COVID-19. Ha kane ka jingialang phylliew jingmut la ia donlang ki Myntri Rangbah jong ka Nagaland, Tripura, Sikkim, Meghalaya, Mizoram, Arunachal Pradesh, Manipur bad Assam.
Ki Myntri Rangbah ki la ai khublei ia u Myntri Rangbah duh ka ri na ka bynta ka jingshim ia ki sienjam ha ka por ban tehlakam ia ka khlam Covid. Ki la ai jingiaroh ruh namar ka jingshim khia kyrpang jong u na ka bynta ki jylla ka thain shatei lammihngi. Nalor ki Myntri Rangbah, la iadonlang ruh ki Myntri Sorkar Pdeng jong ka tnat Kam Pohiing, ka tnat ka koit ka khiah, DONER, Defence bad kiwei kiwei ki Myntri.
Ki Myntri Rangbah jong ki jylla ka thain shatei lam mihngi ki la ai jingtip shaphang ka jingiaid ka kam ai tika ha ki jylla jong ki bad ki sienjam ba la shim na ka bynta ka jingai tika sha ki jaka nongkyndong. Ki la iakren ruh halor ka bynta jong ka jingdon ka jingartatien ban shim ia u tika bad ki sienjam ba la shim ban jop ia kane.
Ki la ai jingtip ruh halor ka jingkiew ki jingdon jingem ha ka liang ka kam ai jingsumar ban lah ban iakhun kham bha ia ki case Covid bad ka jingkyrshan ba la ioh lyngba ka PM CARES Fund. Ki la ai ka jingpynthikna ban shim ia ki sienjam ha ka por ban pynduna ia ki case positive kumjuh ruh ka jingdon ki case ha ki jylla jong ki.
U Myntri Sorkar Pdeng ba dei peit ia ka tnat Kam Pohiing u la kren shaphang ka jingduna ka jingdon ki case ba man ka sngi hynrei u la maham ba ki briew kim dei ban khein sting ia kane. U la ong ba katto katne ki jaka jong ka ri ki sakhi ka jingkiew ki case positive.
U la ban halor ka jingdonkam ban leh ia ka test, ban buddien bad ka jingai tika. U Union Health Secretary u la ai jingtip shaphang ki case Covid ha ka ri bad u la iamir jingmut ruh halor ka jingkiew ki case Positive ha katto katne ki jylla ka thain shatei lammihngi. U la ai jingtip shaphang ki sienjam ba la shim ban kyntiew ka jingpynpoi oxygen bad kumjuh ruh ka jingiaid ka kam ai tika.
Haba ai jingkren ha ka jingialang, u Myntri Rangbah duh u la iaroh ia ki briew, ia ki nongai jingsumar bad ki Sorkar jong ka thain shatei lammihngi namar ka jingtrei shitom jong ki ha ka jingiakhun pyrshah ia ka khlam bad ka jingpynbiang ia ki jingdon jingem na ka bynta ka jingtest, ka jingsumar bad ka jingai tika wat hapdeng ka jingjynjar ka jinglong ki jaka ha ki jylla.
U Myntri Rangbah duh u la pynpaw ka jingkhuslai jong u halor ka jingkiew ki case ha katto katne ki district bad u la ban ia ka jingdonkam ban tehlakam ia kane bad ban shim ia ki sienjam ha ka por kaba biang.
U la ban biang ia ka jingpyndonkam ia ka kyndon micro containment ban tehlakam ia ka jinglong jingman. U la bthah ban pyndonkam pura ia ka jingshemphang bad ki lad ba ki la ioh ha kine ki shi snem shiteng ha kaba iadei bad kane ka kam.
Haba kren halor ka jingkylla sted ka jinglong jong u khniang jingpang, u Myntri Rangbah duh u la ai jingmut ban peitngor bha ia ka jingkylla bad jingbuddien ia baroh ki jait jong une u khniang jingpang uba mih. U la ai jingtip ba ki riewshemphang ki dang peit bniah ia ki jingkylla bad ka jingktah jong u khniang jingpang.
Ha kum kane ka jinglong jingman, ka jingiada bad ka jingsumar ka long kaba donkam, u la ong da kaba ban jur ban bud ia ki lad jingiada ba iadei bad ka Covid.
U Modi u la ban jur ba kalong kaba shai ba ki sienjam kum ka jingpyniajngai iwei na iwei, ka jingdeng ia ka jingda khmat, ka jingai tika kilong kiba treikam. Kumjuh ruh, ka rukom treikam ba kynthup ka jingtest, jingbuddien bad jingsumar kalong kaba iarap bha.
Ha kaba iadei bad ka jingktah ka khlam ia ka kam jngoh kai pyrthei bad ki kam Business, u Myntri Rangbah duh u la maham tyngeh pyrshah ka jinglum briew ha ki jaka rilum bad ka jingbym bud ia ki lad jingiada.
Da kaba kyntait ia ka jingong ba ki briew ki kwah ban leit kai sngewbha hashuwa ban wan ka kylla kaba lai jong ka khlam, u la ong ba donkam ban sngewthuh ba ka kylla kaba lai kan nym wan hi dalade. U la ong ba ka jingkylli kaba kongsan ha ki jingmut jingpyrkhat jong ngi kadei ban long kumno ban iada ia ka kylla kaba lai.
Ki riewshemphang ki la iai maham pyrshah ia ka jinglong bym phikir bad ka jingialum bun briew namar ka lah ban ialam sha ka jingkiew ki case. U la kyntur jur ban kiar na ka jingialum bun briew.
U Myntri Rangbah duh u la ong ba ha ka campaign ‘vaccine for all-free for all’ jong ka Sorkar pdeng, ka thain shatei lammihngi ruh kalong kaba kongsan kumjuh bad ngi donkam ban pynsted ia ka rukom ai tika. Ban weng ia ki jingngeit bakla ha kaba iadei bad ka jingai tika bad ban pynshlur ia ki briew ban shim ia ka tika.
U Myntri Rangbah duh u la bthah ban shim jingiarap na ki kynhun ha ka imlang sahlang, ki jaka pule, ki riewpawkhmat bad ki kynhun niam. U la bthah ban pynsted ia ka kam ai tika ha ki jaka ba u khniang jingpang u lah ban pur.
Haba kren shaphang ka jingmynjur ba dang shen jong ka Kynhun Myntri ia ka song jingiarap kaba T. 23000 klur na ka bynta ban kyntiew ia ki jingdon jingem ban test bad ai jingsumar, u Myntri Rangbah duh u la ong ba kane ka song jingiarap kan iarap ha ka jingpynkhlain ia ki jingdon jingem ha ka liang ka kam ai jingsumar ha ka thain shatei lammihngi.
Kane ka song jingiarap kan pynsted ia ka jingtest, jingsumar, genome sequencing ha ka thain shatei lammihngi. U Myntri Rangbah duh u la ban ia ka jingdonkam ban pynkiew ka jingdon ki jingthiah na ka bynta ki nongpang, ki oxygen bad ki jaka ai jingsumar ia ki khynnah ha ka thain shatei lammihngi.
U Myntri Rangbah duh u la ai jingtip ba la plié da ki spah tylli ki jaka pynmih oxygen ha ka ri lyngba ka PM-CARES bad ka thain shatei lammihngi ruh ka la ioh kumba 150 tylli ki jaka pynmih oxygen. U Myntri Rangbah duh u la kyrpad ia ki Myntri Rangbah jong ki jylla ba kin pyndep kloi ia ka kam ban plié ia kine ki jaka pynmih oxygen.
U Myntri Rangbah duh u la kdew ia ka jingdonkam ban plié ia ki hospital ba shipor namar ka jinglong jingman ki jaka ha ka thain shatei lammihngi. U la bthah ruh ban pynkhreh ia ki briew kiba la ioh jinghikai pyntbit namar ki jaka pynmih oxygen, ki kamra ICU, ki machine thymmai ki ban poi sha ki artylli ki hospital ha ki block kin donkam ia kum kine ki briew. U la pynthikna baroh ki jingiarap na ka Sorkar pdeng.
Ha kaba iadei bad ka jingtest 20 lak shi sngi ha ka ri, u Myntri Rangbah duh u la kren shaphang ka jingdonkam ban phaikhmat kyrpang ban pyniar ia ki jingdon jingem ba iadei bad ka jingtest ha ka district kaba shah ktah. U la ban ia ka jingpynkhlain ban leh ia ki test ryngkat bad ka jingtest paidbah. U Myntri Rangbah duh u la pynpaw ka jingkyrmen ba da ka jingiatreilang ngin lah ban tehlakam ka jingpur kane ka khlam.
