Shillong, Nailar 04: Mynta ka sngi u MDC jong ka Mawhati Konstitwensi u bah Charles Marngar u la ialam ia ki rangbah shnong ban ia kynduh ia u myntri ba dei peit ia ki kam pynroi nongkyndong u bah Hamletson Dohling ban dawa ia ka Block hapoh ka Mawhati, Ri Bhoi District.
U Bah Marius Jyrwa shongknor jong ka kynhun ki saw tylli ki rangbah shnong ka thain Mawhati haba kren ha ki lat pathai khubor ha dien ka jingiakynduh ia u myntri ka sorkar jylla u bah Hamletson la ong ba ha kane ka jingiakynduh na ka liang jong u myntri u la ong ba ia kane ka jingdawa hap ban phah wat bniah bad ha dien kata kin sa ia kren ha ka sorkar ban shim ia ka rai.
Kum ki rangbah shnong ka thain ki sngewkmen ia kane ka jingkular jong u myntri ban phah jurip bad kin sa ia peit ha dien ba ka sorkar kala dep ban phah jurip bad kaei ka rai kaba ka dei ban shim, ha dien ba ka sorkar kala shim ia ka rai kin sa kren biang ia mynta kin nym don ei ei ban kren.
La iathuh ba kane ka dei ka sien kaba nyngkong kum ki rangbah shnong ka thain ba kin ia wan ban ia kynduh ia u myntri sorkar ba dawa ia ka Block, ka daw jong ka jingwan jong ki ban dawa ia ka Block ha Mawhati ka long ba ki don bun tylli ki shnong kiba jngai kumba 100 km na kaba block kaba ki don mynta ka Umsning.
La batai ba katkum ka jingdawa ka jong ki ka long ban kyntup ia ki 52 tylli ki shong hapoh ka thain Mawhati, ki paidbah nongshong shnong ki don palat 21000 ngut ki nongshong shnong katkum ka khana samari jong u snem 2011.
Ka jingjngai jong ki shnong na ka Block buns ien kala pynsep ei ia ki skhim jong ka sorkar namar bun sien ki jingpyntip ki poi slem sha ki shnong bad ha teng hateng ki jingpyntip ki poi ynda la thmut ka por ha kaba ki rangbah shnong kim lah shuh ban pyndep.
Ka jingjngai ka ktah ruh ia ka jinglut, lada u rangbah shnong u ba don kali la jong ka jinglut ka long hadpeng T.1500 tyngka haduh T.2000 tyngka ka bai um phniang bad ki bym don kali ki hap ban wai kali ba ka jinglut kan long kumba T.2500 tyngka haduh T.3000 tyngka, kane ka long ka jingeh kaba la ktah ia ki shnong ki thawi.
