Shillong, Naitung 03: Ka SNSBH ka ai khublei kyrpang ia ka Synjuk Ki Waheh Shnong ka Ri Jaintia, khamtam eh ia ka U Rangbah Shnong bad ka Dorbar Shnong jong ka Khliehriat West bad ia ki VDP kiba la trei shitom bad peitngor ia ka rung ka mih jong ki briew sha ki shnong ki thaw ki.
Ka SNSBH ka sngewsarong ia ka jingnohsynniang bad ka jingtrei shitom jong ki nongkit kam shnong ban peit khmih bad phira ia la ka shnong ka thaw. Ia kane, la sakhi da u MI jong ka DHS uba la ai khubor halor ka jingtrei shitom ka dorbar shnong jong kane ka thain ba la ioh jingtip shaphang ka jingwan poi u Branch Manager, SBI uba la wan na ki thain Assam bad iaid lait ia ki kyndon ba la buh da ka Sorkar.
Namar dei lyngba ka jing pyntip jong kane ka Dorbar Shnong sha ki bor ba dei peit, lah ioh ban phah test ia u bad la lap ba u long positive. Ka sorkar jylla, hadien kane, ka la rai ban ujor da ka FIR pyrshah ia u halor ka jingiaid lait ia ki kyndon ba la buh.
Kumta, ka SNSBH sa shisien ka ai khublei kyrpang ia baroh ki dkhot ka dorbar shnong bad ki VDP bad ngi kitbok kit rwiang ia phi baroh ba U Blei Un nang ai mynsiem ba phin iai trei na ka bynta ka bha ka miat jong ka jylla hi baroh kawei. Ngi kynturuh ia kiwei de ki Dorbar Shnong ba kin long kiba peitngor ia ka rung ka mih ki briew ha ki shnong ki thaw ki jong phi.
