Shillong, Iaiong 17: Ki dkhot ka KSU Laban Circle mynhynin ka janmiet ka 16 tarik u ïaiong, 2021 ha ka por 10 baje janmiet ki la ioh bat ia ki 11 ngut ki bar jylla ha jan Rhino Point kiba ym shem don ïa ki kot ki sla kiba biang. Kitei ki briew ki la ioh rung sha Meghalaya da ka Night Super khlem da bud ia kyndon COVID-19 bad ki la ioh rung suk jai shapoh khlem jingwit sha ka jylla.
Kumban pynkynmaw ba ki bor pyniaid jong ki district ki la pynjari da ka section 144 ban tehlakam ia ka iaid ka ieng ki paidbah naduh 10 baje mynmiet khnang ban pynduna ia ka jingpur stet u khniang jingpang Covid-19.
Kane ka jingjynsur jong ki bor pyniaid ka pynbitar ia ki dkhot jong ka seng bad la iohi ba ia ki trai ri trai muluk ki khang ban iaid ban ieng laitluid ha ki iew ki hat, ki jingiaseng, ki skul bad kiwei hynrei ia ki briew kiba na bar ki ioh rung suk shapoh ka jylla khlem kano kano ka jingpeit bniah ha kum kane ka por ba u khlam COVID u dang kiew sted biang.
Ha kaba iadei bad kane, ka KSU Laban Circle ka la phah da ka ejahar pyrshah ïa ki bor pyniaid bad kumjuh ruh ia u kontraktor u ba khot trei ia kitei ki bar jylla khlem da ioh ka jingbit na ki bor pyniaid bad khlem da register hapoh ka portal jong ka Meghalaya Covid website.
Shuh shuh, ka jingioh laidlan kine ki bar jylla ban rung bad ban mih sha jylla Meghalaya ka buh ia ka jingma kaba khraw halor ka jingkiew sted jong u khniang jingpang Covid-19 bad ruh ia ka Ri ka Jaidbynriew baroh kawei.
Ha kajuh ka por, kane ka jingiohrung ki briew ba nabar khlem ki kot ki sla kiba biang, bad khlem ka bud ruh ia ki kyndon Covid jong ka sorkar, ka pyni ia ka jingkheiñ snep ia ka bor pyniaid bad ia ki bor sorkar ruh kumjuh.
Ka Seng ka buh ka dak jingkylli ia ki bor pyniaid bad ia ka Sorkar jylla ba katne kiew ka khlam, kumno ki rung laitlan, naka jingrung laitlan kine lada jia ba poi u pud ban khangdam biang , mano ban kit khlieh ia ka jingeh ki ba bun balang , khamtam kiba shu im da kaba kamai mynsngi bam da miet, la ong u samla Johney Rapthap ba peit ia ka kam pathai khubor ka shnat KSU na Laban.
