Shillong, Jylliew 08: Ha ka step phyrngab kumba ha ka por 4baje mynstep jong ka 8 Tarik mynta u bnai, ki dkhot ka Seng HYC Jatap bad Shella Area Unit ki lah ioh ka jingpyntip ba ki don ki Khar Bangla kiba rung hapoh u pud u sam ka India lyngba ki jaka kiba hap ha Shella kata ka Patharghat bad Kalatek kiba don ha syndah jong ka Khappud Indo-Bangla.Mar mar ki dkhot ka Seng ki lah leit Sha katei ka jaka bad ki lah ioh ban bat ia uwei u briew uba dei u Nong Bangladesh lyngba ka jingiarap ki Nongshongshnong bad katkum ka jingpyntip jong utei u briew lah ong ba kiwei pat kiba wan ryngkat ki lah lait ban phet noh na katei ka jaka ha kaba katto katne ki lah leit rung noh shapoh u pud ka Bangladesh bad katto katne ki lah rung sha India.
Ha ka jingkylli pyrthuh na une u briew uba lah ioh ban bat bala tip kyrteng kum u Muhammad Hussain u lah pynpaw ba udei napoh Bangladesh bad ha kane ka sngi u rung sha India ban iarap ia ki briew kiba rung tuh shapoh India bad ruh ban leh ki kam khaii tuh ia ki tiar ki tar ha ryngkat ki arngut ki Nong India kiba shong ba sah ha ka Shnong Kalibari kiba kyrteng u, Bono biswas
Bad Subash Baidya.
Ia kane ka kam pynrung tuh ia ki Nong Bangladesh, lah leh lyngba ka jingiarap kitei ki Arngut ki Nong India bad une u Nong Bangladesh u ioh kumba 1000 tyngka na uwei u ne ka briew ba ki pynrung tuh sha India. Ia ka jingsiew sha kitei ki Arngut na India une u briew um tip.
Ka kamram jong u ka long ban pyllait ne ialam lynti ia ki briew na ka jingker kiba don ha khappud bad hadien kata ki sa Wan shim kitei ki Arngut pat ban ialam sha Shillong bad kiwei ki jaka.
Kat kum ka jingiathuh jong une u Khar Bangla lah ong ba kane ka jing pynrung ia ki briew na Bangladesh sha India lynga ka Khappud ha ka thain Shella ka lah iaid mynta shibnai tam bad man ka miet kumba 10 ngut ei ei ki Bangladeshi ki ia pynrung sha India ba kynthup ruh ia ki kynthei bad tang ma u ruh u lah pynrung kumba 50 haduh 60 ngut ei ei ha kine ki khyndiat sngi ba lahdep.
Na ka liang ki Nongialam ka Seng ki lah leit ban aiti ia utei u briew sha ki pulit ka Shella Police Station bad dawa ba dei ban shimkhia ban pynlong ka jingtohkit kaba thikna halor ki jingphla jong utei u Khar Bangla bad ban kem ia ki Dalal na India kiba lah pynpaw haneng.
Ka Seng ka kyntu ruh ia ki bor pulit bad ki Shipai BSF ba kin shimkhia bha ia kane ka kam khnang ban lap ia baroh kiba donkti ha kane ka kam khaii briew lyngba ka khappud bad kumjuh ruh ban lap bad kem ia baroh ki briew kiba lah wan rung tuh shapoh India katkum ka jingpynpaw jong utei u Khar Bangla.
Ia kane ka jingjia lah pyntip ruh sha ki Nongialam ka CEC kiba lah pyntip pat sha u SP ka East Khasi Hills bad SDPO, Sohra Sub-Division bad sha ki heh ka BSF Meghalaya Frontier na ka bynta ban shimkhia ia kane ka kam.
Na ka liang ka Seng kan nang peit pyrman ia kine kiei kiei nangne shakhmat ruh. Kane ka long katkum ka kyrwoh bala phah da u bah
Pyndap Shongwan President HYC-Jatap Unit.
