Shillong, Naitung 29: Ki pulit jong ka East Jaintia Hills District ha ka sngi 28/7/2022 kila ioh ban kem 26 ngut ki khar Bangladesh kiba la wan rung beain sha India bad la register ejahar pyrshah ia ki hapoh jong ka ain Foreigners Act ha Lum Shnong Police Station.
Ki pulit jong ka East Jaintia Hills District kila iathuh ba ia kine ki 26 ngut laioh ban kem ha kine ki 52 sngi. Na ka liang jong ki Pulit bad ki BSF ki don ka jingiatreilang ban khanglad ia ka jingwan rung beain ki khar Bangladesh.
La iathuh ba ha ka 28/7/2022 la ioh jingtip ba ki don bun ki khar Bangladesh kiba la don ha khappud ban rung sha India, halor kane ki pulit ba don ha Umkiang ba peit ia ka jingwan rungtuh ki bar ri bad ki shipai BSF kila pynlong ia ka jingkhang kdong ia ki kar Bangladesh.
Ha kane ka jingiaap ktem, ki pulit kila iohi ba don wei u briew ba la wan ban rung ha ka kawei ka kali Alto kaba don ia u number AS-11-CC-4582 ha jan ka shnong Pyrtakuna, haba iohi ia ki shipai BSF bad ia ki Pulit ka kali kala phet bak na katei ka jaka hynrei la ioh ban bat na Kuliang.
Haba ki pulit kila ioh ban kem ia u nongniah kane ka kali bala tip kyrteng kum u Warif Uddin Laskar ban a Surapur, Gumrah jong ka jylla Assam bad ha ka jingtohkit khlem lah ban jubab ia ki jingkylli, da ka jingiarap ki trai shnong ban kren Bengali la tip ia ka kyrteng jong u nongshong kali kum u Masum Uddin na Bangladesh.
Ha kane ka jingtohkit la iathuh ba don shibun ki khar Bangladesh kiba la dep ban rung sha India hynrei haba iohi ia ki shipai BSF kila phet krad biang sha Bangladesh, kane ka jignwan ki khar Bangladesh sha India dei na ki jaka ba khlem pat ker ksainar shiah, ki khar Bangladesh kila shim ia ka kabu ban rung sha India.
