Ioh pynlait ka KSU kawei ka kynthei kaba na EJH district na kti ki riew sniew ha Delhi

Shillong, Jymmang 15: Ka Khasi Students’ Union (KSU), Delhi Unit, ka kwah ban pyntip paidbah shaphang ka jingjia ba sngewsih kaba iadei bad kawei ka kynthei kaba na East Jaintia Hills, Meghalaya.
Ha ka sngi 14/5/2025 haka por 4 baje, ka KSU Delhi Unit ka la ioh ïa ka phone na kawei ka kynthei kaba dawa jingïarap mardor. Katkum ka jingkren jong ka, ka la kdew ba don kiba bud ïa ka bad ba ka sheptieng ba kin leh ei ei ïa ka.
Mar syn ïoh ïa katei ka phone, ka KSU Delhi Unit ka la pyntip noh sha ki Pulit bad leit lang bad ki sha katei ka jaka. Hadien ka jingtohkit kaba bniah, la lap ba katei ka kynthei la rah pynbiej ïa ka sha Delhi bad la thmu ban pynlong ïa ki kam awria (prostitution)
Hadien kane ka jingsngewphylla, ka KSU bad ki Pulit ki la pyrshang ban wad ïa ka jaka ba ka shong, hynrei mar ïa tip ïa kane ka jingjia, ki briew kiba don ha katei ka jaka ki la phet krad.
Ia kane ka mukotduma la aiti noh sha ka police thana ba dei peit bad ka kynthei la buh ha ka jaka ba shngain hapoh ka jingpeit jong ki bor ba dei peit. Ki jingdonkam kiban pynphai biang ïa ka sha Meghalaya ki dang iaid shaphrang, bad yn leh tang hadien ba la ioh jingbit na ki bor Pulit.
Ka KSU Delhi Unit ka pynpaw ïa ka jingpyrshah kaba tyngeh halor kino kino ki kam thombor ïa ki kynthei bad kyntu ruh ïa ki paidbah ban long kiba husiar bad pynsngew kloi sha ki bor ba dei peit lada lap ne suba don kano kano ka jingjia kaba kum kane .
Ka Union ka ai khublei kyrpang ïa ki Pulit ka Delhi halor ka jingïatreilang bad ka jingpyrkhat lang ha kane ka kam, bad ka long ruh kaba kloi ban ai jingkyrshan