Shillong, Naitung 13: Ki pulit jong ka West Garo Hills District kila ioh ban pynlait ia kawei ka khynnah kynthei kaba la shah rahbor na Rajabala bad ia ki ar ngut ki khynnah kiba la jah na Rynjah, Shillong.
Katkum ka jingiathuh ki pulit kila ioh ia ka jingujor ha Rajabala OP haka sngi Baar ba kawei ka khynnah kynthei kala jah naduh ka 11 tarik mynta u bnai bad ki pulit kila register ia ka ejahar halor ka jingjah kane ka khynnah.
Ha ka jingtohkit ki pulit kila shem ba kane ka khynnah kala shah rahbor ha u wei u briew ba la tip kyrtentg kumu Kingstone B Marak ba dei na Tikrikilla bad rah ia ka sha Williamnagar East Garo Hills District.
Na ka liang ki pulit ka WGH District kila pyntip sha ki pulit jong ka EGH District ha kaba ia dei bad ka khynnah kaba jah bad ha ka jingtohkit la ioh ban kem ia u nongrah bor bad la ioh ban pynlait ia ka khynnah, la ioh ruh ban kurup ia ka kali bad ka mobile phone.
Haba ia dei bad ka jingujor ha Rynjah Police Station ba kila jah ar ngut ki khynnah ha dein ba la ioh ia ka jingkyrpad na ki pulit jong ka East Khasi Hills District ba ar ngut ki khynnah kynthei kila shah rah bor bad ia kine ki ar ngut la ioh ban pynlait na Kherapara jong ka West Garo Hills.
Haba ia dei bad kane la ioh ban kem ia uwei ba kynnoh ba don kti ha kane ka kam rah bor, na ka liang jong ki pulit ka WGH District kila aiti sha ki pulit jong ka East Khasi Hills District mynta ka step ba kin leh ia kaba don kam.
Kawei pat ka jingjia kaba la jah naduh u bnai Jymmang la ioh ban pynlait na Gomaijora, Phulbari, ha kaba ia dei bad kane ka jingjia ar ngut la ioh ban kem kiba la shah kynnoh don kti ha kane ka kam rahbor, hynrei u ba shah kynnoh u Somsul Hoque u dang jah klep bad ki pulit ki dang thwet ban kem ia u.
