Shillong, Nailar 25: Ka jingpynbna jong ka sorkar lyngba ka tnad Commerce bad Industry ha kaba ia dei bad ki jaka bala shim da ka sorkar ban ithuh kum ki “Industrial Estate” kaba la pynmih ha ka 29, Jummang 2019 bad ia kaba la weng noh ha ka 26, Naitung 2019 ka daw baroh ka long ba ka jah shilain na ka jingthoh kaba la wanrah ia ka jingsngewthuh bakla.
Ki thymmei khubor napoh jong ka tnad Commerce bad Industry ki iathuh ba ka jingthmu jong ka ka sorkar ban pynmih ia ka jingpynbna ban khang ia ki khyrdop kiba la buh da ki Hima ki shnong hapoh ki jaka bala ithuh da ka sorkar kum ki jaka ban don ki karkhna, hynrei ha ka por ba pynmih ia ka jingpynbna kala jah noh shilain bad kala pynmih ia ka jingsngewthuh bakla bad na ka liang jong ka tnad karkhana ruh kala weng noh namar kala don ka jingbakla.
Ki lad khubor napoh ka tnad Commerce bad Industry kila iathuh ba ka jingpynmih ia katei ka jingpynbna sorkar ka long ban khanglad ia ki Gate kiba la buh hapoh jong ka Umiam Industrial Party kiba la mih haduh lai tylli kiba ka tnad kharkhana ma dang wad ban tip ka dei ka jongno. Hynrei ha ka jingjah shilain na kaba la thoh kala wan wanrah ia ki jingeh pybnna ha kaba bun kila pynpaw ia ka jingpyrshah.
Na ka liang jong ka tnad karkhana, haba iohi ia kine ki gate kiba la mih hapoh jong ka Umiam Industrial area, ka kwah ban khang ia ki bad ba kin nym mih ha kiwei pat ki Industrial Area kiba don ha kylleng ka jylla. Na ka liang jong ka tnad karkhana kan nym shah ban buh gate hapoh jong ka Industrial Area la ki dei jong ka KHADC, ki Hima ne ki shnong hynrei ia kiba don sha bar jong ka Industrial area kin nym lah ban ong ei ei.
Na ka liang jong ka tnad karkhana ka sngewthuh shai kdar ba baroh ki jaka ki hap hapoh jong ka Sixth Schedule lait noh ka European Ward, hynei kane ka jingsngewthuh bakla kala mih tang na ka daw ba ka jah shilain ka jingthoh na ka jingpynbna kaba la mih bad haba ka tnad ka shem ba ka don ka jingbakla ha ka jingthoh kala weng noh ong ki thymmei khubor napoh ka tnad Commerce bad Industry jong ka sorkar jylla.
