Shillong, Nailar 05: Hadien ba ka Dorbar Shnong Urkaliar ka la kyrpad ban pyndonkam ia ka jaka ha rud surok ha shi lynter ka kynroh bad ka MES da ka jingthmu ban thaw ia ka lynti iaid kjat (footpath) na ka bynta ka jingmyntoi ki paidbah nongiaid nongieng, u MLA ka Pynthorumkhrah, u Bah AL Hek ula phah ia ki ophisar na ka tnad PWD (Roads) ban wan jurip ia kane ka jaka.
Ha kane ka jingjurip ia kane ka jaka bad ki nala um ha kane Shnong la ia synran lang da ki nongialam shnong ba kynthup ia u Bah JS Nongsiej, Asst Rangbah Shnong, u Bah S Diengdoh, Secretary lem bad kiwei. “Ka jingdon kane ka jaka kaba khlem pyndonkam ryngkat ki niut ki khlaw bniap ka pyni jakhlia bad i long lehnohei”, la ong u Bah S Diengdoh ha ki nongthoh khubor.
“Ngi sngew ba lada pyndonkam noh ia ka da kaba shna ia ka lynti iaid kjat kan pynitynnad bad i khuid khamtam kane ka surok kaba pyndonkam da ki heh ki haiñ ban iaid sha NEIGRIHMS ne kiwei ki jaka ha New Shillong”, la ong u Bah S Diengdoh. “Kan long ka jingshngaiñ ia kiba iaid ba ïeng na kane ka surok lada ïoh ban shna noh da ka lynti iaid kjat”, la bynrap shuh shuh u Secretary.
Na ka liang u Bah JS Nongsiej u la ong ba kane ka jingkhmih lynti ban ïoh da ka lynti iaid kjat ka dei ka ban ai ka jingmyntoi lada lah ban pyntreikam noh ia ka. “Ngi khmih lynti ba kan urlong noh shen khnang ba kan long ka jingitynnad ia ka shnong ka thaw bad na ka bynta kiba iaid ba ïeng na kane ka jaka”, la ong u Asst Rangbah Shnong.
Ha kawei pat ka bynta, ka Dorbar Shnong ka la ai khublei ia u Bah AL Hek uba la shim khia ban ia treilang ha ka jingthmu ka Dorbar Shnong na ka bynta ka jingmyntoi u ba bun balang lada lah ban pynurlong kloi ia kane ka lynti iaid kjat.
