Shillong, Nohprah 20: Ka seng Assam Public Works (APWs) mynta ka sngi kala wan ban ia kynduh ia u myntri rangbah ka jylla Meghalaya u Conrad K Sangma, ha kaba kila ai ia ka dorkhas ban kyntu ia u ban ia kren bad ka sorkar pdeng na ka bynta ban pyntrei kam tang kawei ka Inner Line Permit (ILP) ha ka dong shatei lam mih ngi baroh kawei.
Haba kren ha ki lad pathai khubor ha dien ka jingiakynduh ia ka APWs u myntri rangbah ka jylla u la ong ba kine kila wan sha Meghalaya ban wan ai ia kane ka dorkhas ban don tang kawei ka ILP ha ka thain shatei lam mih ngi jong ka Ri India bad kaba ar ka long ha kaba ia dei bad ka jingiadei ia thied jaka.
Kane ka jingwan ka jong ka ia hap bad ka jingsngew jong ki briew jong ka dong shatei lam mih ngi jong ka Ri India ha dien ba la pynlong ain ia ka Citizenship Amendment Act, 2019 ba kumno ia ki trai jylla kane ka thain ban ioh ia ka jingiada.
U myntri rangbah u la ong ba kane ka jingdawa ka jong ki ka lontg kaba shnongnia bad kila kyrpad ban ia kren ia kane ka phang bad ka sorkar pdeng, na ka liang jong u myntri rangbah u la ong ba un ia kren ia kane bad ka sorkar pdeng bad un sa peit kaei ka jubab kaba ka sorkar pdeng ka don ban ong, kyrmen ia kaba bha.
Na ka liang jong u President ka APWs u Aabhijeet Sharma u la ong ba ka jingwan jong ki ka long ba kila iohi ba ha dien kane ka Khrsitmas u myntri kam poh iing jong ka sorkar pdeng un sa ia kynduh ia u myntri rangbah ka jylla Meghalaya.
Kumta kum ka seng ka shim ia kane ka lad ban ia kynduh ia u myntri rangbah ka jylla Meghalaya namar ha North East, ka sorkar pdeng ka sngap bad shah skhor ia kaei kaba u myntri rangbah ka jylla Meghalaya u kren sha ka sorkar pdeng. Halor kane ki wan ban ia kynduh bad ban ai ia ka dorkhas ban dawa na ak sorkar pdeng ban ai tang kawei ka ILP ia ka NE baroh kawei.
U Aabhijeet Sharma president ka APWs, u la ong ba dei sa tang kane ka lad kaba khatduh ban iada ia ka North East, lada ka jingialeh ka long la ka jong ka jong kan logn kaba eh hynrei lada ia pyrkhat lang kawei lah ban ia da ia ka North east kawei ka ILP langba ka ryndang syiar na khappud Assam bad West Bengal. Kiba la ia wan lang ha kane ka jingiakynduh la don lang u Dhruba Joyti Talukdar, u Ghanashyam Kalita bad u Rajib Deka ki dkhot jong ka APWs.
