Ka bam ka long ka thymmei jong ka kolshor jong ngi bad ka jinglong shai:Kiren

Shillong, Nohprah 06: U Kiren Rijiju, Myntri khynnah jong ka sorkar pdeng ba dei khmih ia ka Youth Affairs & Sports bad Myntri khynnah jong ka Minority Affairs bad u Rameswar Teli, Myntri sorkar pdeng ba dei khmih ia ka Food Processing Industries ki la iashim bynta ha ka Chief Ministers’ Conclave jong ka ‘North East Food Show 2019’ kum ki nongshah khot sngewbha ba kyrpang, mynta ka sngi ha madan Polo, Shillong.

Ia kane ka jingialang la pyniaid da u Conrad K. Sangma, Myntri Rangbah ka jylla Meghalaya bad la iadonlang u Myntri Rangbah jong ka Arunachal Pradesh Prema Khandu, Myntri Rangbah jong ka Tripura Biplab Kumar Deb bad u Myntri ba dei khmih ia ka Tourism, Civil Aviation, Commerce bad Industry jong ka Sikkim B. S. Pant.

Haba ai jingkren sha ki nongiashim bynta  ki dkhot jong ka ‘North East Food Show 2019’ bad ki ophisar jong ki tnad sorkar bapher bapher ha ka conclave, u Rijiju u la ong ba, “Ka bam ka long ka thymmei jong ka kolshor jong ngi bad ka jinglong shai. Ia ka bam la ithuh bad ki briew, ka jaitbynriew bad ka ri.

U myntri khynnah ka sorkar pdeng u Rijiju u la ong ba dei ban pyni ia ka thain shatei lammihngi ha ka rukom kaba dei da kaba rah ryngkat ia ki jingbam jong kane ka thain.” U Myntri u la ong ba ka bam bad ki karkhana ba iadei bad ki mar bam ha ka thain shatei lammihngi jong ka ri ki don ka lad ban long ka bynta kaba khraw ha ka jingkiew ka ioh ka kot bad ki don tang katto katne ki thain kiba don ia kum kane ka lad. U la bynrap ruh ba ka thain shatei lammihngi ka long kaba pahuh ha ka um bad ka don ruh ia ka khyndew kaba seisoh.

U Myntri u la pynpaw ruh ba ki nongrep bad ki nongtreikam lajong kidei ban pyrshang ban pynmih ia ki mar bam kiba kyrpang ha ka thain shatei lammihngi. U Myntri u la ai ka jingiaroh ia ka sorkar Meghalaya kaba la pynlong ia ka food show kaba ai ka rynsan bad ka kabu ia ki nongrep, ki nongseng kam lajong, ki trai karkhana ban pyni, ban iaphylliew jingmut bad wanrah ia ka iew na ka bynta ki mar jong ki. U la kyntu ruh ba ha ki por ban wan baroh ki phra tylli ki jylla ki lah ban iasnohktilang ban pynlong ia kane ka food show.

U Rameswar Teli u la ai ka jingiaroh ia ki nongpyniaid ia ka ‘North East Food Show 2019’. U Myntri u la ong ba ka sorkar ba mynta ha ka ri ka la sdang shibun ki kam ban kyntiew ia ka jingpynmih mar bam, ban pynshlur ia ki nongrep bad kumjuh ruh ban kyntiew ia ki karkhana ba iadei bad ki mar bam. U la pynshai ba ka sorkar pdeng ka la phaikhmat kyrpang halor ban plie ia ki karkhana mar bam ha ka thain shatei lammihngi jong ka ri.

U Myntri u la ong ba ka sorkar pdeng kan ai jingiarap 75 percent sha ki nongseng kam lajong ban plie ia ki karkhana ba iadei bad ki mar bam ha ka thain shatei lammihngi jong ka ri. U la ong ba ki kam ki dang iaid halor ka 42 Mega Food Parks ha India bad 6 tylli na ki kidei ha ka thain shatei lammihngi jong ka ri. U la ong ruh ba shen yn sa sdang noh ban plie 2 tylli ki Mega Food park ha Meghalaya bad Sikkim.

U la bynrap ba ka sorkar ka thmu ban plie ia ka IIT kaba long kum ka institute ha Guwahati na ka bynta ban leh ia ki kam wad bniah halor ki bam. U Myntri u la ong ruh ba ka don ka jingdawa ia ki mar bam jong ki jylla ka thain shatei lammihngi kum u Bhot Jalakiya (King Chili) bad Black Rice bad kumta ka don ka lad ha ka kam khaii pateng na ka bynta ki karkhana bam ha kane ka thain.

U Prema Khandu, Biplab Kumar Deb bad B. S. Pant ruh ki la ai ka jingiaroh ia ka sorkar Meghalaya kaba la pynlong ia kane ka prokram bad la pynpaw ruh ia ki kam ba la sdang da ki sorkar jong ki ban kyntiew ia ki karkhana jingbam ha ki jylla jong ki.

U Conrad Sangma u la pynkut ia ka conclave da kaba ong ba kane ka prokram kalong kaba sdang jong ka mission ban kyntiew ia ka Food Economy bad ki iew jong ka thain. U la ong ruh ba kane kan long ka prokram kaba man la ka por ha Meghalaya bad ha ka sien ban wan kan long ha ka 26 haduh 28 tarik Naiwieng, 2020.

Ia ka ‘North East Food Show 2019’ kaba lai sngi la pynlong da ka sorkar Meghalaya bad ka food innovation network ‘SIAL India Group’ ryngkat ka jingkyrshan ki tnad / ki kynhun ba kynthup ia u Myntri ba dei khmih ia ka Micro Small and Medium Enterprises, Meghalaya Institute of Entrepreneurs bad Directorate of Food Processing.

Ki la don katto katne ki nongseng kam lade bad ki kompani  kiba la iashim bynta ha kane ka NFS. Kine ki la wan pyni ia la ki mar kum ki khaw ba bun jait, ki slasha, ki musli musla bad ki wine. Ki la pyni ruh ia ki rukom song ia kine ki mar.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet