New Delhi, Iaiong 17: Ka Central Consumer Protection Authority (CCPA) ka la ai jingmut ia ki jaka ai jinghikai ba kin bud ryntih ia ka ain Consumer Protection Act, 2019 bad ki jingbthah ban iada na ki jingpynbna ba ialam bakla ha ka Kam Ai Jinghikai, 2024.
Ka bor ba dei khmih ka bataishai ba ka long kaba donkam ba ki jingpynijong ki, ki long kiba thikna, kiba shai, bad kiba lait na ki jingkynnoh kiba ialam bakla ne ka jingbuhrieh ia ki jingtip ba kongsan na ki briew. Nalor kata, ki jaka ai jinghikai ki dei ban kiar na kaba ai jingkular ia ka jingjop kaba la thikna.
Ki jaka ai jinghikai ki dei ban pynpaw shaiïa ki jingtip ba kongsan ha ki jingpynbna jong ki, kynthup ka kyrteng jong u samla pule, ka kyrdan, ka jait jinghikai, bad la la siew ne em ïa ka jinghikai. Ki jingpynbna ki dei ban long ha kajuh ka jingheh jong ki dak kumbalong kiwei pat ki jingtip kiba kongsan ban pynthikna ba ki briew kim shah ialam bakla.
Hadien ka jingpynbna dang shenïa ki result jong kieksamin kum ka IIT-JEE bad NEET, ka CCPA ka la ïohi ba ki jaka ai jinghikai kim bud ryntihïa ki Jingbthah ban ïada na ki jingpynbna ba ïalambakla ha ka Kam ai jinghikai, 2024.
Da kaba buh jingmut ia ka jingpynkhein ia ka ain bad ki jingbthah, dang shen ka CCPA ka la phah ki Notis sha ki katto katne ki jaka ai jinghikai kiba iadei bad kine ki mat, Ka jingpynthikna ia ka jingioh kam bad shah jied, Ka jingpynthikna ia ka kyrdan ha ka JEE bad NEET.
Ka jingpynkhein ia ka hok jong ki briew, Ka jingpynbna kaba ialam bakla bad Ki rukom treikam bym hok kynthup ia ki jingshakri ba la kularkiba ym shym la ai, la pynsangeh ia ka jingrunghynrei ym shym la pynphai ia ka bai lutksan, ka jingdkoh ha ka jingai jingshakri, ka jingbym lah ban pynphai biang/shi bynta ka bai lutksan.
Ki jingkam bad ki rukom treikam ba la kdew haneng ki paw ba ki pynkheiñïa ki kyndon bapher bapher jong ka aiñ kynthup ïa ka Section- 2(28) bad 2 (47) jong ka Consumer Protection Act, 2019 bad ki jingbthah ban ïada na ka jingpynbna ba ïalambakla ha ka kam ai jinghikai, 2024
Ia ki jingbthah ban iada na ki jingpynbna ba ialam bakla ha ka Kam ai jinghikai, 2024, la pynmih ha ka 13 tarik Naiwieng 2024. Kine ki jingbthah ki khang ia ki jaka ai jinghikai ban ai ia ki jingkam bad pynbna kiba baklane kiba ialam bakla ban kyntiew ia ki jingshakri jong ki bad ban leh ia ki kam kiba thok ne ki rukom treikam bym hok.
Kine ki jingbthah ki pyni ia ka sienjam kaba kongsan ban iada na ka jingshah ialam baklaki samla pule bad ban pynthikna ba kin ym shah ialam baklada ki jingkularlamler ne shah pynbor ban don ki jingiateh bym iahap.
La saindur iaki jingbthah ban kyntiew ia ka jingshai bad jinglong hok ha kane kakam, ban iarap ia ki samla pule bad kibahaiing jong ki ban shim ia ki rai kiba bniah katkum ki jingtip kiba thikna bad kiba shisha. Kine ki jingbthah ki bynrap ia ki kyndon kiba la don lypa bad pynkhlain shuh shuh ia ka rukom pyniaid kaba peit ia ki jingpynbna ba iadei bad ka kam ai jinghikai.
Ha ka sienjam kaba kongsan ban iada ia ka hok jong ki briew bad ban pynthikna ia ka jinglong kaba shai ha ka kam ai jinghikai, ka CCPA ha kine ki lai snem ba la dep, ka la shim khia pyrshah ia ki jingpynbna kiba ialam bakla, ki rukom treikam bym hok, bad ki jingpynkhein ia ka hok jong ki briew da ki jaka ai jinghikai.
Ha kaba iadei bad kane, ka CCPA kala pynmih 49 tylli ki notis bad pynngatia ka kuna kaba T.77.60 lak ha 24 tylli ki jaka ai jinghikai bad bthah ia ki ban sangeh noh ia ki jingpynbna ba ialam bakla bad ki rukom treikam bym hok.
Ka CCPA kham mynshwa ka la shim khia pyrshah ia ki jaka ai jinghikai kiba ai jingshakri na ka bynta ki jingiakhun ia ki eksamin ba kynthup ia ka UPSC CSE, IIT-JEE, NEET, RBI, NABARD, nalor kiwei kiwei, da kaba pynskhembiang ia ka jingkut jingmut jong ka ban pynthikna ba ym dei ban don kinokino ki jingpynbna kiba thok lane kiba ialam bakla kiba long pyrshah ia ka Consumer Protection Act, 2019.
