Shillong, Jymmang 08: Ka seng Congress hapoh Meghalaya hynne ka sngi ka la pynbna ba kan nym don bynta ha ka All Party Committee ban iakren halor ka jingthmu pyniasoh lynti rel hapoh ka jylla.
Ia kane la pyntip da u secretary ka Meghalaya Pradesh Committee u bah Manuel Badwar haba kren sha ki nongthoh khubor u bah Manuel u la ong ba ka jingthaw All Party Committee da ka sorkar jylla ban iakren halor ka lynti rel ka pyni shai ia ka jingbym lah jong ka Sorkar ban pynbeit ia ki mat kiba ktah ia ka bha ka miat ki paidbah nongshong shnong ka jylla.
U Manuel u la ong ba kane ka jingthaw Committee ka pyni ruh iaka jingbym lah ka sorkar ban weng dalade na ki jingeh ba la pynsngew da ki paidbah nongshnong ka jylla, bunsien ka sorkar jylla kam ju sngew donkam ban iatreilang lang bad kiwei ki sengsaiñ pyrthei na ka bynta ban shim ia kino kino ki rai bad kane ka jingthaw Committee ka dei tang ban pynthame paidbah.
Shuh shuh u la ong, hadien ba ka sorkar ka sngew ba ka ka la sahkut ha ki jingeh, ka sngew ba kam lah ban weng ialade na kita ki jingeh, kumta ka sngew donkam ban iawer lut ïa baroh khnang ban shah kynnoh lang ïa baroh, kane kam long kaba dei.
U bah Manual u la buh jingkylli pynban ba, Shaei jah kata ka All Party Committee ha ka por ba ka sorkar J
jylla ka thmu wanrah Casino, Shaei jah ka All Party Committee ha ka por ba iakren pynbeit pud bad ka jylla Assam.
Haba pynpaw ba ka Congress kam treh ban don lang haka All Party Committee, u Secretary ka Meghalaya Pradesh Congress Committee u la ong, ia ki la jied da ki paidbah ban ialam ia ka sorkar, ki dei ban pyndep ia la ka kamram kumba la bynshet da ki paidbah.
