Shillong, Naitung 06: U Lamphang ka iing dorbar thawain ka jylla u bah Metbah Lyngdoh mynta mynta ka sngi u la iathuh ba ka jingtei ia ka iing dorbar kaba thymmai la lah ban pyndep haduh 85% bad la buh ia ka thong ba ia ka dorbar mang tyngka jong u snem 2022-2023 yn pynlogn ha ka iing dorbar kaba thymmai.
Haba kren ha ki lat pathai khubor mynta ka sngi, u Lamphang ka iing dorbar u la ong ba wat ha pdeng kane ka jingkhang dam ka jingtrei ka iaid sha khmat, la ong bun na ki nongtrei ki la leit sha ki shnong jong ki.
La ong ka jingtei ia kane ka iing kaba sah mynta ka long sa tang ban pynieng ia ka Dom kaba dei ka tnum jong ka iing dorbar, ki engineer jong ka kila dep ban wan peit ia ki nar namar la shna ha Kolkatta bad ia ki yn sa wan kit lyngkhot lyngkhot bad kin wan poi sha ka jylla ha kaba kut u bnai ban wan.
La ong ba ka jingtrei kum ka jingpynpur ia ki wire kala iaid ryngkat ryngkat, kala don ka jingialang bad ki heh pulit ban peit ia ka jingpahara, ka MePDCL ban buh ia ka station light, ka tnad khlaw ban thung dieng, ka tnad sam um ban pynpoi ia ka um, ka NIC ban shna ia ki Internet.
La iathuh ba ka jingshna ia ki kamra ban shong ophis u Lamphang, Myntri Rangbah ka jylla, kamra jong ki myntri, bad kiwei kiwei ki kamra kala iaid sha khmat mynta wat hapdeng ka jingduna jong ki nongtrei.
Na ka liang jong u Lamphang u la ong ba u kwah ban pyndep ba ia ka ophis jong ka Meghalaya Legislative Assembly yn rah sha Mawdiangdiang ha u snem ban wan kane ka dei ka thong bad khmih lynti ba yn lah ban pyndep ia kane ka bynta ka ba nyngkong ha ka snem ban wan.
