Shillong, Rymphang 06: Ka Business Advisory Committee jong ka Ïingdorbar Thaw Aiñ ka Jylla Meghalaya kaba la ïakynduh mynta ka sngi ha Ophis trei kam u Lamphang ka iing dorbar u Thomas A. Sangma ha Khyndailad, Police Bazar, Shillong, ban pyndep ïa ka calendar jong ka dorbar mang tyngka 2025.
Ha kane ka jingialang la ia don lang u Deputy Chief Minister ba dei peit ia ki kam parliament, u Bah Prestone Tynsong, nongialam ka liang pyrshah, u Dr Mukul Sangma, ki nongthaw ain u Bah Charles Pyngrope bad u Bah Lakhmen Rymbui, ryngkat ki heh ophisar sorkar.
U Lamphang u la pyntip ba ka Dorbar Mang Tyngka kaba 10 sngi kan sdang ha ka 28 tarik u bnai Rymphang, 2025 bad kan kut ha ka 13 tarik u Lber, 2025.
“Ngin sa don shi sngi trei pura—lai sngi na ka bynta ki Kam jong ki Dkhot Shimet bad hynriew sngi na ka bynta ki Kam Sorkar,” u la pynpaw.
U la pynthikna shuh shuh ba ka dei ban don ka por kaba biang na ka bynta baroh ban ïashim bynta, bad lada don ka jingduna, lah ban pynjlan ïa ka jingïalang, wat ha ka sngi palei, lada donkam.
Halor ka jingtei ia ka iing Assembly ba thymmai, u Lamphang u la ai ka jingtip ba thymmai halor ka jingtei ïa ka ïing dorbar thymmai ha Mawdiangdiang, da kaba pynpaw ba palat 90 percent na ka jingtrei ka la dep.
Haba pynpaw ia ki jingsngewkhia halor ka jingpynslem ban pyndep, u Lamphang u la ban jur ba ka kam ram ba kongsan jong u ka long ban pynthikna ba ka jingshngain jong ka jingtei kan ym shah ktah.
U la pynthikna shuh shuh ba ka jingïalang jong ka dorbar pyrem mynta u snem 2025 kan long ha katei ka ïing dorbar ba thymmai.
