Shillong, Iaiong 14: U Symbut Myntri Rangbah ka jylla u bah Prestone Tynsong u la ong ba ka sorkar kala shim ia ka rai ba ka eksamin jong ki samla pule ba dei jong ka Higher Secondary School Leaving Certificate (HSSLC) kan iaid beit kumba la pynbeit da ka Meghalaya Board of School Education(MBOSE).
U bah Prestone u la ong ba kane ka eksam kan sdang ha ka 16/4/2021 bad na ka liang jong ka sorkar kala bthah ia baroh kito ki jaka ba don ia kane ka eksamin ba kin pynbiang ia ki lad jingiada baroh bad la kyntu ia ki kmie ki kpa ba kim dei ban khuslai ia ki khun haba ki leit ban thoh ia ka eksam.
Ha kane ka jingialang kaba la long mynta ka sngi ka sorkar kala shim ia ka rai ban pynbiang ia baroh ki COVID-19 Committee ha ki shnong ki thaw, ha ki District bad haduh ka kyrdan jong ka sorkar ban ia treilang ban ia khun pyrshah ia kane ka khlam COVID-19.
Ha kane ka jingialang kaba la long mynta ka sngi la aiti sha ka tnad ka koit ka khiah ka jylla ba kan peit ia kane ha ka jingiaid bad ki Committee ha ki shnong ki thaw, ki District haduh ka jylla.
Ka sorkar jylla kala shim ia ka rai ba baroh kito kiba wan na sha bar jong ka dong shatei lam mih ngi jong ka Ri India hap ban test da ka RTPCR bad ia kiba na ki jylla shatei lam mih ngi jong ka Ri India hap ban test da Antigen test.
