Shillong, Naiwieng 27: Ka Federation of Persons with Disabilities, ka seng jong ki briew kiba don ka jingduna kaba kynthup ia ka Meghalaya Deaf Association, Khasi Disabilities Association,Garo Hills Association of the Deaf,West Khasi Disabled People Organization, Meghalaya Liberation of Visually Impaired bad ka All Meghalaya Association of Person with Disabilities kan pynlong jingiakhih da kaba shong kyllaiñ mangor ha ka 03rd Nohprah 2019.
Ka jingiakhin shong kyllain mungor kan long ha Parking lot ha Additional Secretariat kaba don marpyrshah bad ka ophis BSNL Shillong naduh ka por 10.00 baje mynstep haduh 04:00 baje jan miet. Ka Federation ka shim ia kane ka sienjam namar ka jingbym pyntreikam ka sorkar ia ka bhah kam bhah jam jong ki briew kiba don ka jingduna ha ki dkhot met ha ka jylla Meghalaya.
Na ka liang jong ka seng kala iakren bunsien hynrei ka shu kut tang ha ki kot sada, katba ki tnat sorkar kiba dei ban thungkam kim ithuh satia ia ngi. Kumta na ka liang ka Federation ka kyntu ia baroh ki briew kiba don ka jingduna ha ki dkhot met kiba don ha kane ka shatri bad kiwei de ban ia wan lang khlem pep sha katei ka jingiakhih ban pynbor ia ka sorkar ban pyntreikam pura ia ki hok jong ngi khamtam ha ka iohkam iohjam kata 4% katkum ka aiñ The Rights of Persons with Disabilities Act, 2016.
Ka Federation ka kyrpad ruh ia ki sengbhalang kiba ju peit ia ka bha ka miat ha ka jylla sngewbha ban ai lem ka jingkyrshan ia ngi ki briew kiba don ka jingduna ha ki dkhot met ha kane ka jingiakhih bad ngi kyrmen ba ka jingdonlang jong ki, kan ai mynsiem ia ngi.
