Shillong, Nailur 30: Mynta ka sngi ka seng HANM kala leit ban aid a ka jingthoh sha u Symbut Myntri Rangbah ka jylla u bah Prestone Tynsong ba kyntu iaka sorkar ban shna ain ban mang kam 80% iaki trai jylla ha ki kompeni jong ki riew shimet.
U bah Raiwan Sohtun haba kren ha ki lat pathai khubor ha dien ba la dep ban ia kynduh ia u symbut myntri rangbah la ong ba ka sorkar ka dei ban shna ia ka ain ban mang kam 80% ha ki kynhun jong ki riewshimet na ka bynta ki trai jylla naduh ki kompeni bad hakiwei kiwei ki lat ai kam.
Ha kane ka jingiakynduh na ka liang jong u symbut myntri rangbah la pynsngew ha ki dkhot ka HANM ba ka sorar ka don ka jingsngewkhia bha halor kane la phang bad la ai ka jingkular ba leh se hapoh hynriew bnai ka sorkar kala lah ban leh ei ei ha kaba ia dei bad ka ain kaba ia de bad kane ka phang.
Ka jingkwah ka seng ba ka sorkar ka dei ban don ia ka ain ka long ba lada ki samla pule kim ioh kam ha ki kam sorkar hynei ki lah ban ioh kam pat ha ki kam jong ki riew shimet, kaei kaba ki dawa ka long ba kum ka jylla Karnataka bad Haryana kila wan rah ia ka ain ban mang kam 75% ia ki trai kylla, ka seng kam kren ia ki kam sorkar hynrei ia ki kam ha ki kynhun shimet.
Ha kane ka jingiakren bad u symbut myntri rangbah ka jylla ka seng kala ia kren ba ki don ki samla pule kiba la pass Phd ruh kiba apply ia ki kam peon ha ka sorkar ka daw ka long namar ba ki ia beh ba ioh ka kut noh ka rta wat kam, kaei kaba ki kren kam dei ia ka rta hynrei ka dei na ka bynta kito kiba khlem kam khlem jam.
La ong ba ki don shibun ki samla kiba la pytbit ia lade ha kikam kiba kyrpang hynrei la thung kam ia ki ha ki bynta ba ka jingpule jong ki bad ka kam kim ia hap, lada ka long kumne kan myntoi aiu ban phah pule iaki ynda kila wan phai ym don ka kam na ka bynta jong ki, dei hangne ba la rong noh ia ka jabieng sha bar ka jylla.
Ka dawa jong ka jingdawa 80% ka dei namar ba ki briew jong ka jylla Meghalaya ka don tang 30 lak ki nongshong shnong bad kine ki kyntup ia ki samla pule, kiban sa shong thiat na ka kam bad ka long ruh ba lada ym lah ban thung kam 80% ruh hynrei ki trai jylla kim ioh kam namar ba duna briew.
Ka nongrim kaba ka seng HANM ka ieng ka long ba ka seng ka pdiang ia ka jingwan bei pisa ban seng kam ha kane ka jylla la kidei na kano kano ka bynta jong ka Ri India lane jong ka pyrthei ruh, ka seng HANM ka kwah ia ki briew ba kin wan seng kam, halor kawei ka kyndon ba ki trai jylla kin ioh kam, ki briew jong ka jylla kin kiew.
Kumba ka long bun na ki jaka ai kam ki duna bha ki briew jong ka jylla kam don wat tang 20%, lada ka long ha kane ka rukom ka seng kam ong beit ba wat wan ban bei pisa ban seng kam ha kane ka jylla lada ym lah ban ai kam ia ki trai jylla, kaei kaba ka seng ka kwah ka long wan bei pisa, ki kin iohnong bad ki briew ka jylla kin ioh kam, la ong u bah Raiwan Sohtun.
