Shillong, Risaw 11: U Sirdar jong ka Elaka Tyrna u Bah Donborwell marbaniang u la ong ba ka hima kala shim ia ka rai ban pynlong ia ka “ Tyrna Living Roots Festival 2018” kaba ar sngi lynter ha ka 7 bad 8 tarik jong u Naiwieng ban wan.
Ha ka jingkren jong u Sirdar jong katei ka Elaka u la ong ba ka jingthmu ban pynlong ia kane ka tamasa ka long ban khring shuh shuh ia ki nongwan jngohkai pyrthei sha katei ka thain ha kaba ki don ar tylli ki jingkieng Diengjri.
Ia kane ka tamasa yn pynlong da ka jingiatrei lang bad ka Indian Council Cultural Relation (ICCR) bad kane ka long ban khriang ia ki nongwan jngohkai pyrthei sha nongkyndong bad ha kitei ki ar sngi kin don ki jingpyninam ia ki shad tynrai ym tang na katei ka thain hynrei na kiwei ki bynta jong ka North East.
La iathuh ruh ba ha kane ka tamasa yn pyninam ruh ia ki bam tynrai jong katei ka thain khamtam eh ia u Sohmynthar u laba la jan duh jait ha kane ka por kaba mynta. Ka hima kala shim ia kane ka rai ban long ha u Naiwieng ka long ba ka dang dei ka por ba ki jingbam tynrai ki la mih ha katei ka por.
Haba jubab ia ki jingkylli ha kaba ia dei bad ka jingpynneh pynsah ia ki jingkieng diengjri ha katei ka thain u Bah marbaniang la ong ba ka la don ka jingiakren bad u BDO ka Shella Bhalaganj kumno ban leh ha kaba ia dei bad kane bad na ka liang jong ka hima kala buh ruh ia ka adong ban nym shah ban iaid bun briew ha ka juh ka por ha kine ki jingkieng.
