Shillong, Jylliew 22: Ka Seng ka pynpaw ia ka jingpyrshah halor ka khubor ba lah mih ha kine ki sngi ia ka jingpyntreikam jong ka Taxation Department ka Sorkar Jylla ia ka “One Time Settlement Scheme” ban map ei kumba 30% ia ka Khajna ba ki Petrol Pump kiba don kumba 230 tylli ha ka Jylla baroh kawei ki hap ban siew ia ka Sorkar Jylla ha ka dur jong ka VAT.
Katkum ki khubor lah sngewthuh ba ka tnat Taxation jong ka Jylla kam shym la lah ban lum ia ka khajna ba lah tip kum ka VAT kaba lada shu antad kan poi kumba 650 Klur tyngka na kitei ki Petrol Pump ha kine ki 3 tylli ki snem ba lahdep. Lada pyntreikam ia katei ka OTS Scheme da kaba map ei noh 30% ia ka khajna kaba mut ba ka Sorkar kan duhei kumba 195 klur tyngka ka pisa paidbah.
Na ka liang ka Seng ngi pyrshah jur ia katei ka jingleh jong ka Sorkar Jylla hapoh ka jingialam jong u Minister Incharge u James Sangma ban pyntreikam ia katei ka Scheme namar kane ka Khajna kadei kaba ki paidbah ki hap ban siew ha ka por ba ki leit ban tied umphniang na ki Petrol Pump katkum ka dor ba ka Sorkar ka buh.
Kumba ban shu ai nuksa, ngi hap ban siew kumba 17-18 tyngka shi liter ka Petrol bad 12-13 tyngka shi liter ka Diesel ha ka dur jong ka VAT nalor ka dor jong ka Umphniang. Ia kane la siew hi da ki paidbah nongpyndonkam ia ki Umphniang ha ki kali ki jong ki ne ha ki machine ym da ki dealer kiba dei ki Trai jong kitei ki Pump.
Te hato ka shong nongrim ba ka Sorkar kan ai ia katei ka pisa ba siew ki paidbah sha kitei ki Trai jong ki pump? Haba ma ki ki lahdep ioh lypa ia ka Commission ka jong ki man ka shi liter ka umphniang ba ki die.
Lada ka Sorkar ka sngew ba ka dei ban map ei ia katei ka Khajna ka lahdei ban thawlad ban pynphai noh ia katei ka pisa sha ki paidbah kiba long ki trai jong katei ka pisa kaba ki lahdep siew ha ka por ba ki thied ia ka umphniang ym ban shu ai ei sha ki Trai jong kitei ki Petrol Pump.
