Shillong, Lber 07: U Acting Lyngdoh ka Kur Paliar Mawkyrda Lai kpoh Lai Kynthei u Bah Phaiborlin Paliar u la ong ba ka jait Mawpyrdoi bad ka jait Sangleiñ kim lah ban tuklar ïa ka Kur Paliar Kpohbah. Ia kane u bah Phaiborlin Paliar u la ong ha ka jingiakynduh bad ki nongthoh khubor ha shillong press clubs ha ka 7 tarik, Lber, 2025
U la ong ia kane dei ba namar ka la mih ka jingpyrshah ban aiwai ia ka khlaw Hiang Diengsong katkum ba la pynbna da u Secretary jong ka Kur Paliar Mawkyrda Lai kpoh Lai Kynthei u Bah Elphedius Paliar ha ka 28 tarik, Rymphang, 2025.
Ha ka jingiakynduh ha Shillong Press Club Bah Phaiborlin u la pyni ruh ia ka Dulir kaba la shon muhor ha u snem 1878 da u Pa’iem Borsing Syiem, uba dei u Syiem jong ka Hima Langrin ban pynshisha ia ka jinglongtrai jong ka Kur Paliar Mawkyrda Lai kpoh (Lai Kynthei) ia ka Ri Lyngdoh Kur Paliar Mawkyrda Kpohbah.
Katkum kane ka dulir ka pynshisha ba kane ka khyndew ka la hiar pateng ha ki khun kynthei na u Ksanlang bad u Sngi Lang, kiba kyrteng ka Phonlang, ka Mahlang.
Ka Iewphanmitlang Paliar Mawkyrda Kpohbah bad u la ong shuh shuh ruh ba kito kiba pyrshah ia ka jingaiwai ia ka khlaw da ka kur Paliar kim dei satia kiba don bynta ha ka jinglong trai ia ka Ri Lyngdoh, ka jingkamtrai ka jong ki, ka long tang da ka ktien namarba kim lah satia ban pynshisha ia ki dulir bad ki kot ki sla ki ba biang la ong u bah Phaiborlin Paliar.
