Ka jingiakhih kan kut tad haduh ba kan da trei kam ka ain iada jaidbynriew: Robertjune

Shillong, Nailur 18: U Lamphang jong ka Confederation of Meghalaya Social Organisation (CoMSO) u bah Robertjune Kharjahrin u la ong ba ka jingiakren bad u myntri rangbah ka jylla u Conrad K Sangma ha ka jingiadon lang kiwei ki myntri sorkar, na ka liang jong ka kynhun kila kren shai ba ki ieng halor ka nongrim ban iada ia ka jaidbynriew.

Haba kren ha ki lad pathai khubor ha dien ka jingiakynduh bad u myntri rangbah ka jylla u Conrad K Sangma ha iing sah jong u mynta ka sngi ha Okland, la iathuh ba na ka liang jong u Cornad bad ki myntri sorkar kiba ia don lang ha kane ka jingiakren kila pynpaw ia ka juh ka jingsngew ban iada ia ka jaidbynriew.

U bah Robert u la ong ba ka CoMSO kan iaid beit ia ki jingpynbna kumba la dep bad kin pynkut ruh ia ki jingiakhih jong kane ka kynhun tad haduh ba ka sorkar kan pynmih ia ka jingpynbna sorkar ba la wanrah ia ka ain iada jaidbynriew lane ia ka ain yn pdiang da ka iing dorbar thaw ain ka jylla.

Na ka liang jong ka CoMSO ka buh ia kane ha khmat jong ka sorkar, lada ka sorkar ka kloi ban pyntrei kam noh ia ka ain iada jaidbynriew ki ruh kin weng noh ia ki jingiakhih, katba ka sorkar kam pat pyntrei kam ia ka ain iada jaidbynriew ki ruh kin dang iaid beteng ia ki jingiakhih.

La pynshai ruh ba ka CoMSO kala pynjem ia kaei kaba ka kren baroh shikatta, ha kaba ia dei bad ka ILP, ka daw ka long ba kam myntoi lada ioh ia ka ILP khlem da don ia ki kyndon ba la lah ban khang ia ka jingwan jong ki briew kiba wan na shabar sha kane ka jylla.

Kaei kaba ka CoMSO ka kwah ka long ban ioh ia ka ain ka ban don ia ki lai tylli ki kyndon, ban shah ia ki briew ban wan sha ka jylla hapoh ki kyndon jong ka ain, ka jingai jingbit ban wan sha ka jylla kam dei ban palat ia ka 179 sngi bad kaba lai ka long ban kem ia ki briew kiba wan rung beain. Lada la pynrung ia kine ki kyndon kam pher ia ka kyrteng la ki jer da kano kano ruh.

Ka CoMSO, balie ka pyrshah ia ka MRSS Act, ka long ba katei ka ain kaba la pdiang da ka iing dorbar thawain ka jylla kam don ia kitei ki lai tylli ki kyndon. Mynta ka CoMSO kam kwah ban don byn tylli ki ain iada jaidbynriew, ka dawa na ka sorkar ba kan pynkylla noh ia ka MRSS Act da kaba pynrung ia kitei ki lai tylli ki kyndon.

Lada pynrung ia kitei ki lai tylli ki kyndon ka long ba ka jingmut jong ka ILP naduh ka kyndon kaba 2 haduh haduh ka kyndon kaba hynriew jong ka ILP kala rung ha ka MRSS Act, ka CoMSO ka kwah ban pynrung ruh sa ia ka kyndon kaba 7 jong ka Eastern Frontier Regulation 1873 bad kane ka kyndon ka kren ia ka jingkhanglad ia ki bynriew ki reiwlum ban thied jaka.

U bah Robert u la ong ba ka jingdawa ban iada ia ka jingwan tur ki briew kiba na sha bar sha kine ki jaka riewlum kala dei naduh ka snem 1948 bad kata kala paw ha ka Bordaloi Sub- Committee, kane ka jingdawa ban iada na ka jingwanrung ki briew kiba na sha bar kam dei shuh kaba thymmai.

Haba ia dei bad kane ka jingiakren, un nym ong ka long kaba jop, namar ka CoMSO kan shim ba ka jingiakren ka long kaba jop tad haduh ban da iohi ba ka sorkar kala pynmih ia ka jingpynbna sorkar ba la pyntrei kam ia ka ain, lane ka iing dorbar thawain ka jylla ka la pdiang ia ka ain ban iada ia ka jaidbynriew.

 

 

What Next?

Recent Articles

Leave a Reply

Submit Comment

*