Shillong, Naitung 18: U symbud myntri rangbah ka jylla u bah Prestone Tynsong u la pynpaw ka jingartatien la ka jingleit jurip ia ki jaka ia kajia khappud hapdeng ka jylla Meghalaya bad Assam kan long ne em mynta u snem, namar ba ka Assam ka don ia ka ilekshon MLA ha u snem 2026
U bah Prestone Tynsong u ba dei u Chairman ka Regional Committee ban pynbeit pud bad ka jylla Assam u la pynpaw haba kren shaki lad nongthoh khubor, ba na ka liang ka sorkar Meghalaya ka la long kaba la pynkhreh ban leit jurip ia ki jaka ia kajia khappud bad ka Assam.
Hynrei namar ba ka jylla Assam kan don ilekshon ha u snem 2026 kumta u la pynpaw ba um tharai ki Regional Committee ka Assam kin pyllait por ban leit jurip.
U bah Prestone u la ong ba ka sorkar Meghalaya ka dang ap ia ka jubab na ka sorkar Assam ban ïa pynbeit ia ka tarik ban leit jurip ia ki jaka ia kajia pud hapdeng baroh artylli ki jylla.
Haba kylli halor ka Block-I bad Block-II, u bah Prestone u la ong ba ka Notification 1950 ka kdew shai na ka liang ka sorkar Meghalaya ka la thoh sha ka sorkar Assam ban pynphai biang ia ki jaka ba la pynhap sha ka Karbi Anglong.
Shuh shuh u la ong ba ka don beit ka jingiakam mar kylliang ha kito ki shnong ba don ki jaitbynriew Pnar ne ba don ki Jaitbynriew Karbi bad kane ka jingiakam markyliang kan don beit tad haduh ki Regional Committee jong baroh 2 tylli ki shong ban pynbeit ïa u pud u sam.
U la kyntu ïa baroh ki nong shong shnong la ka dei ki nong Meghalaya ne Assam ban burom ia ka Status Quo ban ïa sngewthuh jingmut markylliang khnang ban nym mih kano kano ka jingjia ba sngewsih ha ki thain khappud
