Shillong, Jylliew 4: U myntri rangbah ka jylla u Conrad. K Sangma u la pyntip ba la pynjlan iaka jingkhang dam kan long ha baroh kawei ka jylla haduh ka 14 tarik mynta u bnai, katba ha kiwei ki distrik lah aiti ha ki deputy commissioner ba kin peit katkum ka jingibit hapoh ka distrik.
U myntri rangbah ka jylla u la iathuh ba ha ka jingiakynduh ki myntri mynta ka sngi ki la iakren halor ka jinglong jingman kane ka jingpang COVID ha ka jylla.
Ha kane ka sngi la iakren halor ka jingpynkhreh ban pynbiang iaki oxygen ha baroh ki distrik bad kumba ka long mynta bun naki kor oxygen la lah ban pyndait iaki hajan baroh ki distrik bad lehse ia ka jaka pyndap tyndong oxygen kaba ha ha Jingal ha West Garo Hills, ha Umsawli, ha East Khasi hills yn sa lah ban pyndep ban pyndait iaki kor ki bor hapoh kine ki ar taiew ban sa wan.
U myntri rangbah u la ong ba ynda la dep kine ki artylli ki jaka ban pyndap tyndong oxygen, u kyrmen skhem ba ka jingduna oxygen kan nym don shuh.
La iathuh ruh ba ka sorkar ka la thied biang sa 66,000 tylli ki dawai tika na ka bynta ban ai tika ia kito kiba hapdeng ka rta 18-44 snem, na bynta kito kiba 45 snem shaneng ki dawai tika ki dang don 72,000 tylli ha jylla.
U myntri rangbah u la kyrpad iaki paidbah ban iatrei lang bad ka sorkar ha kane ka jingialeh pyrshah iakane ka jingpang, u la ong ba ym pat lah ban ong namar kiba iohpang ka don long palat spah beit man ka sngi.
Hakajuh ka por na ka liang ka sorkar ka la bthah ia baroh ki deputy commissioner ba kin ia peit lang ryngkat bad ki sub-divisional officers lem bad ki BDO ban peit kiey ki jait jingtrei bad ki jaka ban pyllait iaki jingtrei.
Hakajuh ka por la iohi ba bun na ki riew stad ki la kren lupa ba kane ka jingpang kan sa wan biang ha ka khylliap kaba lai bad kumba ka paw ban shah ktah eh kin long ki khynnah hynrei ban shim iaka rai ban ai tika ka shong ha ka sorkar pdeng. Hakajuh ka por ka sorkar jylla ka la bthah iaka tnad ka koit ka khiah ba kan pynkhreh iaki lad iada ban iaka kaipod dei ban ai sha ka sorkar hapoh 30sngi.
