Shillong, Risaw 13: U Bah Paul Lyngdoh Working President jong ka party UDP ha ka jingpynshai ha kaba ia dei bad ka khubor kaba la mih halor ka IOA bad AA ia ka jingkren jong u wei na ki nongialam
jong ka party u la ong ba ka jingkren ka dei ka jingkren shimet ym jong ka party.
Kane ka jubab jong u tei u nongialam jong ka party UDP ka dei halor ka jingpan jingpynshai jong ka “Federation of Khasi State” (FKS) kaba la pan jingshai na ka party UDP, ia kaba la phah sha ka party UDP ha ka 23/09/2019 bad ia ka jubab la ioh ha ka 24/09/2019. Ka jingpynshai kaba la pan da ka FKS ka long hato ka jingkren ka dei ka nongrim jong ka party UDP ne ka jingsngewshimet.
Na liang jong ka FKS ha dien ba kala ioh ia katei ka jingpynshai ha ka 26/09/2019 ka la ai khublei ia ka jingioh ia ka jingpynshai ba la ioh na u Bah Paul Lyngdoh, Working President, United Democratic Party, bad lyngba kane ka shithi ka Federation of Khasi States ka la pynsngew ba dei ban don ka jingiakynduh bad ka jingiakren ha kaba baroh ki trai kam, ki MLA, MDC, FKS bad ki Khlieh Nongsynshar ki dei ban ia don lang ha ka miej ia kren ban ia pyrkhat lang halor kane ka kam kaba khia.
La pynsngew ruh ba kan long kaba iarap lada ka UDP kan tyrwa sha ka Sorkar Jylla ba kan thung ia ka Committee kyrpang ka ban kynthup ia baroh ki traikam ha kaba yn don lang baroh ki seng sain pyrthei ha kaba kin lah ban ia pynbeit ban thaw ka ain ka Assembly ne Council ka ban ithuh ia ki jingsynshar tynrai naduh naduh Dorbar Shnong, Dorbar Raid haduh Dorbar Hima ia ka ba baroh ngi sngewthuh ka long kaba donkam palat khnang ban ioh kawei ka jingmut kumno ban ioh iakren bad ka Sorkar India ban pyntreikam ia ki jingiateh bad ki jingiakut katkum ki kyndon IOA & AA.
Ha ki jingpynshai kiba bud u Bah BM Lanong, MDC, u la pynshai ba ki Syiem, Sirdar, Lyngdoh, Wahadar, ki don ia ka Executive, Legislative and Judicial authority bad u la kubur ruh ba ki khlem soi ia ka instrument of merger,Ki dulir pynwai pyndam hima hynrei ha ka juh ka por kine ki jingsynshar bad kitei ki jingiateh ki jingkular haduh kine ki sngi kim paw ha kaba shai hapoh ka Sixth Schedule lane Constitution Ri India.
Haduh kine ki sngi, wat ki Act ki Rule jong kiba bun ki Hima ,Elaka ki dang sah kut mynta la palat 70 snem tang katto katne tylli ki Hima ki don ILP bad kita ki kyndon ILP ruh kim long kiba don bniat lane kiba shai. kim lah ban klet ba kiba bun ki Rangbah Shnong, ki Sordar Shnong ki la shah kem bad shah set ha along.
Ki kynmaw ba u Bah Robert Kharshiing, Rangbah Shnong bad MP barim u shah kem namar ba pyntreikam ia ka rai ka Dorbar Shnong ha u September 1983, hapoh ki kyndon National Security Act(NSA), u Sordar Wahkhen, u shah set halor ka The Contempt of Courts Act 1971, bad ki bun kiwei kiwei ki ba ngat ha ki jingshah kem khlem tip ia ki ain Ri India.
Kane ka jia namar ki Ain India kim ithuh ia ki Dorbar Synshar tynrai, ngin hap ban pynkynmaw ba ka Hukum jong ka iing bishar ba donburom ka Meghalaya High Court dang ioh tang ka Stay Order na ka iing Bishar kaba ha khlieh duh ka Supreme Court dei tang ka jingpynsangeh shipor.
Shuh shuh la pynsngew sha u Bah Paul Lyngdoh, MDC, Working President, UDP, ba ka Federation of Khasi States katkum ka ki kyndon IOA & AA ki la thaw ia ka legislative Assembly ka Khasi States Constitution Making Dorbar kaba kynthup 25 ki Khlieh Hima 16 ngut ki Syiem.
Ka Khyrim State, Mylliem State, Nongkhlaw State, Cherra State, Nongstoin State, Maharam State, Nongspung State, Langrin State, Mawsynram State, Myriaw State, Rambrai State, Mawiang State, Bhowal State, Malaisohmat State, Nobosohphoh State bad Jirang State.
Lai ngut ki Lyngdoh, Sohiong State, Mawphlang State, bad Lyngiong State uwei u Wahadar Shella State, san ngut ki Sirdar, Mawlong State, Mawdon State, Dwara Nongtyrnem State, Nonglwai State, bad Pansanngut State.
Ki nongmihkhmat ba jied da ki khun ki hajar jong ki Khasi States 12 ngut Khyrim State, 11 ngut Mylliem State, 4 ngut Maharam State, 4 ngut Nongkhlaw State, 3 ngut Nongstoin State, 3 ngut Cherra State, uwei na Nongspung, Langrin, ,Mawsynram, Myriaw, Rambrai, Mawiang, Bhowal, Malaisohmat, Nobosohphoh, Pamsanngut, Jirang, Sohiong, Mawphlang, Lyngiong, Shella, Mawlong, Mawdon, Dwara Nongtyrnem, bad Nonglwai, bad 8 ngut ki nongmihkhmat kiba shuh sieh 4 ngut ki longkmie.
Baroh lang katei ka Assembly ba nyngkong jong ki Khasi States ka la don 88 ngut ki dkhot. Katei ka Dorbar Thaw Ain ki Khasi States la plie ha ka 29 tarik July 1947 da u Lat ka Assam ha Shillong. Hynrei kyndit ha u snem 1950 namar ba ka IOA & AA ka khlem paw dur hapoh ka Constitution Ri India katei ka Dorbar Thaw Ain ka sah teng ban ioh ia ka jingithuh da ka Sorkar India.
La pynsngew shuh shuh ha u Working President, UDP ba ki bor KHADC ki la mynjur ia lai tylli ki BILLS ha u snem 2006, 2016 bad 2018 ban thaw ia ka Council jong ki Nongsynshar naduh Shnong, Raid haduh Hima.
Hynrei kitei baroh lai tylli ki bill la pynphai da ki bor Sorkar jylla da kaba ong ba hadien ba ka Sorkar ka la dep bishar bniah ia kitei ki bill la shem ba ka KHADC katkum ka Sixth Schedule kam shim don ka bor ban thaw bad mynjur kum kitei ki BILLS da kaba ong ba “the District Council does not have the legislative competence to pass such bills”.
Ha kaba iadei bad kane ka mat ka Federation of Khasi States ka pynsngew jur ba haba ka Sorkar Jylla ka pyntip sha ki bor KHADC ba kim don ia ka iktiar “Legislative Competence” ban thaw ia kum kitei ki Bill ki la dei ban khot jingialang ia ki trai kam ka KHADC bad ia ka Federation of Khasi States ban ia kren ban ia shai mano pat ka bor kaba lah ban thaw ia ka council lane Assembly ki Khasi States.
Lada ka dei ka bor jong ka Sorkar Jylla ne ka Sorkar India ki la dei ban shim ia ka jingkitkhlieh ban pynbeit ia kitei ki jingeh ban pynlong ain ia ka Bill ka ban plie lad ia ki Nongsynshar Hima Khasi States ban ioh jaka lyngba ka Schedule kaba thymmai Schedule Khadlai lane ka jingpynbeit thymmai Constitutional Amendment ia ka Riti Synshar India lyngba ka Article thymmai khnang ban ioh ia ka bor jong ka Ain.
Ka FKS ka khmih lynti ba ki seng UDP,HSPDP,KHNAM,PDF bad NPP kiba bat ia u shabi ka sorkar kin leh ia kaba donkam ban thung ia ka Committee Sorkar kaban pyndep ia kitei ki jingsahkut ban ithuh da ka Constitution Ri India ia ki Hima Khasi States, la pynsngew bad ban jur lyngba ka shithi -email sha u heh UDP.
Ka synjuk Federation of Khasi States bad ki khun ki hajar naduh ki kyntoit, ki shnong ka Ri Khasi bad Jaintia ki la long kiba duhnong na kane ka jingsahkut kitei ki jingiateh bad ki jingkular mynta la 70 snem na ka daw ka jingbym ia sngewthuh hapdeng ki Dorbar ki KHADC bad Sorkar Jylla halor katei ka phang ioh jingithuh ki Hima Khasi States hapoh ka Constitution Ri India.
Ka FKS ka kyrmen ba kin ioh ia kynduh bad ka seng UDP ban ia kren markhmat halor kane ka phang. Kane ka long katkum ka kyrwoh kaba la phah da u nongai buid jong ka FKS u bah John Kharshiing.
