Shillong, Kyllalyngkot 26: Ka jingrakhe ia ka Republic Day kaba 74th ka long mynta ka sngi ha Polo ha kane ka nongbah Shillong ha kaba iala lama jong ka Ri India la pynher da u lat ka jylla u Brig Dr. B.D. Mishra (Retd) ha kaba u la shim ia ka salute ruh ha ka jingiaid kilan met ki pyrton shipai, Pulit, NCC bad ki khynnah skul.
Haba kren ha kane ka sngi u Lat ka jylla u la pynkynmaw ba ka riti synshar jong ka Ri India la pdiang ha kum kane ka sngi ha u snem 1950 bad ban pynioh ia ka hok, Ka jinglaitluid, ka jinglong kaba mar iaryngkat, ban kyntiew ia ka jingialong kawei, ka jingiaburom ba markyllaing bad ban pynlong ka jingiatylli kawei ka Ri.
La pynkynmaw ba ha ka por ba shah synshar ha ki phareng la shah ban bein bad shah leh beain, hynrei mynta pat ka Ri India kala ioh ia ka riti synshar kaba bha tam ha ka pyrthei. Ha ka juh ka por u Lat la kdew ruh ia ka bynta part IV A, Article 51A kaba kren ia ki bynta kum ki nongshong shnong ba dei ban leh ban pynlong ia ka Ri India kaba khraw.
La kdew ba dei hakum kane ka sngi ban kynmaw burom ia ki nongsain dur ia ka riti synshar jong ka Ri India, khamtam ia u shnongknor ka kommittee u Dr. Rajendra Prasad bad ia u Dr. Bhim Rao Ambedkar, ha ka juh ka por ym dei ban klet ia ki nongialeh laitluid kiba la aiti ia la ka jingim namar ka Ri.
Haba phai sha ka jylla, la ong ba ka jylla ka don 38 lak ki nongshong shnong, Ki Khasi, Jaintia bad Garo u la kyntu ban pynneh pynsah ia ka shong suk shong sain ha ka jylla bad ban ia long kawei, la kdew ruh ba ka jylla ka dang shu dep ban rakhe ia ka jingdap 51st snem ha ka 21st Kyllalyngkot 2023.
La ong ba ka jylla Meghalaya ka don ia ka jingitynnad ka mariang, ki jingdon jingem kiba bun kiba lah ban kyntiew ia ka jylla, la kyntu ba to kum ki paidbah ban ia trei lang ban kyntiew iaka jylla ha baroh ki liang, ka ioh ka kot ka roi ka par.
Ka long kaba sngewtynnad ban iohi ia ka shong suk shong sain, ka sorkar ruh kala shim ia ka sienjam ban pynbeit ia u pud u sam bad ka jylla Assam da kaba soi ia ka soskular ha ki hynriew tylli ki jaka ba don jingiakam mar kyllai na ki12 tylli kiba la dep ban ia kdew shai.
Ka long kaba snew kmen ba ka seng HNLC kala wan shakhmat ban ia kren iasuk khlem dab uh kyndon ban ia kren hapoh ka riti synshar jong ka Ri India, ka jingiakren kala sdang bad pynpaw ia ka jingsngewnguh iaka sorkar pdeng kaba la ai ka jingkyrshan ha kane ka jingiakren ia suk.
Ka long ka burom ia ka Ri India ba kan ioh ban long president haka G20, ka ban long kawei ka pyrthei, kawei ka iing kawei ka lawei. Ha ka juh ka por ka United Nation kala pynbna ma mynta u snem 2023 dei ka snem jong u Krai ia u bat hung ha ki 130 tylli ki ri ka pyrthei ha kaba ka Ri India ka shallan shabar ri ia u krai kane kan long ka jingmyntoi ia ki nongrep.
Ka jylla ka dang shu dep ban rakhe ia ka 13th National Voters Day, ha ka juh ka por ka jylla kan sa leit sha ka elekshon, la kyntu ia ki paidbah ban mih sha khmat ban thep ia ka vote jong ki khlem jingtieng jingsmiej bad ban rah ia ka jylla sha ki kyrdan kiba kham sha jrong. Ai khublei ia ki shipai ki pulit kiba pynthikna ban don ka shong suk shong sain.
