Shillong, Nailur 15: U Myntri ba dei peit ia ka tnad sam um u bah Reniktone L Tongkhar haba jubab ia ka jingkylli bynrap jong u bah Adelbert Nongrum halor ka jingsaw ka um kor mynta la shiphew sngi, u myntri u la ong ba ka jingsaw ka dei ka jingbyjli ia ki pipe um na ki 750 sha ka 1000 mm bad kane ka pynlong ia ka um ban saw.
Na ka liang jong ka PHE ha ka jingshisha kala pynlait ha sawmer sha ruh ia kane ka um kaba wan na ki pipe um thymmai ba kan khuid hynrei la shem ba ka dang saw ne kane ka daw ba la pynwan biang ia ka um sha ki pipe um ba 750 mm shipor haduh ban khuid ka um.
Hynrei ha kane ka jingkylliang ia ki pipe um kala don ka jingbthei biang ki pipe um bad ka um ka sa saw, u myntri u la ong ba ia kane ka jingeh ynsa lah ban pynbeit ha kine ki khyndait sngi.
Haba jubab ia ka jingkylli jong u Zenith M Sangma halor ka jingkyrduh um ha sorkar Tura, u myntri la ong ba ka jingkyrduh um ha sor Tura, la ong ba kala don ka jinghiar ka jingmih ka um na tyllong ha kine ki khyndiat snem , ka jinglait ei ka um na ki pipe um kane ka dei ka jingeh kaba la wan rah ia ka jingduna um bad ka jingduna ki top um.
Ka sorkar kala shim ia ki lat ki lynti ban pynbun shuh ki top um ha kaba la mang pisa T.14.37 klur ban shna ia ki 10 tylli ki top um, kaei kaba jia ka long ba ia ka jingtan um la leh da ka PHE katba ka jingsam ia ka um pat la leh da ka GHADC bad kala don ka jingiakren naduh u snem 1995 hato ka tnad sam um kan shim noh na ka GHADC.
Haba ia rap ban jubab ia ka jingkylli bynrap kaba la kylli da u nongialam ka liang pyrshah u Dr Mukul Sangma u myntri rangbha ka jylla u Cornad K Sangma u la iathuh hapoh ka iing dorbar ba ka jingeh ha kaba ia dei bad ka um ka long ha satla ka pyrthei bad ka long kaba don kam ban iada ia ki tyllong um.
U Myntri Rangbah u la ong ba la ioh ia ka jingmynjur ka ADB ia ka skhim kaba T.500 klur tyngka ban pyntreikam ban iada ia ki tyllong ha kane ka jylla, u myntri rangbah u la ong ba ka sorkar kala shim ia ki lat ki lynti baroh ban iada ia ki tyllong um.
