Shillong, Lber 18: U Myntri ba dei peit ia ka tnad bor ding u James K Sangma haba jubab ia ka jingkylli u Zenith M Sangma la iathuh hapoh ka iing dorbar ba ka dei ka jingshisha ba la thaw ia ka kam hapoh jong ka MePDCL ia kaba la tip “Officer on Special Duty” ha ka kyrdan Chief Engineer na peit ia ka Western Zone.
U myntri la ong ba ia mynta ki don ar ngut ki Chief Engineer ha Western Zone bad ka jingthaw ia kane ka post kaba thymmai ha ka kyrdan Chief Engineer ka long tang ban peit bniah kyrpang ia ka jinglum bai light ha Garo Hills.
Haba jubab ia ka jingkylli bynrap, na ka liang jong u myntri kam bor ding u la ong ba ha Garo Hills ki don shibun ki jingeh kaba ia dei bad ka jingsam ia ka bor ding elketrik kane ka jingeh ka dei kaba la don la slem bah dei na kane ka daw ba ka sorkar ka ialeh ban pynbeit ia kane ka jingeh.
U la ia nuksa ba ka jingioh lum ia ka bai light na ka ophis ba dei ka thain Chokpot ka long tang 12.86%, na Baghmara 12.12% bad Mendipathar ka long tang 22.64%, haduh katne ne ka jinghiar ha kaba lum ia ka bai light, ban ia nujor tang bad ka Sohiong ka jingiohlum bai light ka long haduh 82%, East Khasi Hills 83.91%.
