Shillong ,Jylliew 24: u myntri ba dei peit ia ka tnad bor ding u James. K Sangma u la ong ba ka jingkynthoh kaba la mih ha ki lad pathai khubor haba iadei bad ka Meghalya Energy Efficiency Private Limited kaba la shna da ka sorkar, u myntri u la kyntait halor ki jingkynthoh.
U myntri u la ong ba kane ka company kan long hapoh jong ka MeECL bad ka jingshna iakane ka company MEEPL ka long ban peit kyrpang iaka jingkylla haki kam pynmih bor ding katkum ka jingkylla ka por.
U shongknor jong kane ka kompany un long hi u myntri ba dei peit iaka tnad bor ding bad u managing director jong ka MEEPL un long u secretary ka tnad bor ding jong ka sorkar jylla. Nalor kine u CMD jong ka MeECL u long ruh uwei naki dkhot hapoh ka company namar ka MeECL ka don bynta lang bad ka MEEPL.
Ka jingleh jong ka sorkar Meghalya ban thaw ia kane ka MEEPL ka long kumba leh ka sorkar pdeng ba ka thaw iaka Energy Efficiency Services Limited ia kaba la leh da ka sorkar pdeng la slem bah.
Ha kane ka juh ka rukom ka sorkar Meghalya ruh ka la thaw ia kane ka MEEPL namar ba ka sorkar ka iohi ba kane ka jing kylla sted ha kaba iadei bad ki kam bor ding bad kadei ka bynta ruh kaba hap don iaki briew kiban don iaka jingtbit ba kyrpang.
Kumba ka long mynta ka MeECL ka don ia lai tylli ki shnat treikam, ka jingpynmih bor ding, ka jingsam iaka bor ding bad iaka jing pyniaid ia ka bor ding, ban peit iaka jing iaid beit iaid ryntih ki kam bor ding la thaw iakane ka company ban peit iakane ka bynta lada ka don ka jingkynnoh ba ka don ka jingbakla la dei ban ong ruh iaka sorkar pdeng baka jingthaw iaka EESL ka long beaiñ.
Ka MEEPL ka long kum kiwei ki company jong ka sorkar u don u chairman, u MD ,bad kiwei ki dkhot ruh, iakine la shim naka tnad bor ding, planning MeECL, ka tnad pla pisa, tnad aiñ, kin don ki nongtrei katto katne hynrei kan nym da don ka jinglut namar ba ki dkhot kiba don kila dei lupa ki nongtrei sorkar.
