Shillong, Naitung 15: Mynta ka sngi ka tnad Labour ryngkat bad ka Meghalaya State Skills Development Society (MSSDS) ba dei jong ka sorkar jylla ia kaba la kyrshan da ka Asian Development Bank kala rakhe ia ka “ World Youth Skill Day” ha U Soso Tham Auditorium, Shillong.
Ha ka jingkren jong u Bah Prestone Tynsong Deputy Chief Minister la ong ba ka jingthmu jong kane ka “Skil Development” ka long ban hikai ia ki samla ha ki bynta bapher bapher khnang ba ki lah ban ioh kam ioh jam, ne ban ieng ha la ki jong ki kjat bad ban nym iabeh tang ia ka kam sorkar.
Na ka liang jong u Deputy Chief Minister u la kyntu ia kiba ai jinghikai ba kine ki samla kiba la wan ban shah hikai bad ki ba kin long kiba la ban im ha dien ba kila pyndep ia ki jingshah hikai. Ha kane ka sngi na ka liang jong u myntri u la sam ruh ia ki syrnot sha kito kiba la pyndep ia ki jinghikai.
Kum shibynta jong ka jingrakhe ia kane ka sngi la buh ruh ia ki jaka batai ha ki shnat jinghikai ki bapher bapher kiba ka sorkar ka ai sha ki samla ha kane ka sngi ba kin ioh ia ka jingshai kaba bniah. Kiba la ia don lang ha kane ka sngi ki long u Principal Secretary jong ka sorkar jylla u ba dei ruh u CEO, MSSDS, u Bah D. P. Wahlang, Executive Director, MSSDS, u B. Hajong bad u Labour Commissioner, u Bah B. Mawlong.
