Shillong, Lber 10:U Myntri rangbah ka jylla u Conrad K Sangma haba jubab ia ka jingkylli jomg u bah H.S Kharpran haba iadei bad ka kam tih maw tih shyiap la ong ba hap ban buh ryntih katkum ki kyndon kiba la don ha ka Meghalaya Minor Minerals Concession Rules,2016 kaba la pynkylla haduh mynta .
Kane ka long katkum ka kyndon kaba 15 jong ka Mines and Minerals (Development and Regulation)Act, 1957 kane ka dei ka ain jong ka sorkar pdeng,kumta ia ka jingtih maw tih shyiap la hap ban bud ia ki kyndon kiba la pynmih ha u snem 2016 bad kumjuh ha u snem 2020 ba iadei bad ka kam tih shyiap ba ia ka jingpynbna sorkar la pynmih da ka Ministry of Environment Forest bad Climate Change.
Halor ka jingkylli bynrap u Myntri rangbah ka jylla u la iathuh ba ka sorkar ka khlem khang ia ka jingtih maw tih shyiap hynrei ki hap ban ioh ia ki jingbit katkum ki kyndon.
Ka sorkar ka sngewthuh ba ia ka rukom tih maw tih shyiap jong kiba bun, ka jingtih ka long tang ban pyndonkam ha la ki jaka jaka dei halor kane ba u snem 2024 ka sorkar la thung ia ka kommittee ba la khlieh da u symbut myntri rangbah .
Kane ka committee kala iashong ia ka jingiakynduhlang jong ki heh sorkar na ka tnad khlaw kumjuh na ka tnad ain bad kila ai ia ka jingai jingmut sha ka sorkar ban ioh jingbit ban tih maw tih shyiap ka dei tang na ka tnad khlaw bad ka jingbymdon jingujor na u rangbah shnong .
Halor kane ka sorkar kala phah sha ka sorkar pdeng ban pynmih ia ka jingpynbna sorkar katkum ka Environment Protection Act 1986 ia kaba ka sorkar jylla ka dang ap khmih lynti ban ioh ia ka jingmynjur na ka sorkar pdeng khnang ba ki nongtih maw tih shyiap kiba rit ba ria kin ioh lad.
