New Delhi, Naiwieng 01: Ka tnat ki par mar poh khyndew ka dang bteng beit ban pynshlur ia ki kam tih mar poh khyndew ha kylleng ka ri India. Kumta, khnang ban pynshlur shuh shuhia ka jingwad ia ki mar poh khyndew ha ka thain shateilammihngi kaba riewspah bha ha kane ka bynta, la pynlong ia ka jingialang “Northeast Geology & Mining Ministers’ Conclave kaba nyngkong mynta ka sngi ha Niathu Resort, Chumukedima, Dimapur, Nagaland.
Ha kane ka jingialang, ka komiti jong ki myntri Sorkar jylla hapoh ka thain shateilammihngi kiba dei khmih ia ki tnat kam par mar poh khyndew ka la pynsngew ia ki jingartatien bad ki jingdawa jong ka hakhmat u Myntri Sorkar Pdeng ba dei khmih ia ki tnat par mar pohkhyndew bad Parliamentary Affairs, u Pralhad Joshi.
Ha ka jingai jingkren jong u, u Pralhad Joshi u la ong ba ka thain shateilammihngi ka dei ka jaka kaba la ioh ka jingpeit bniah na ka bynta ka roi ka par hapoh ki sienjam jong u Myntri Rangbah Duh ban pynkylla ia ka India.
Ka thain shateilammihngi ka dei ka jaka kaba kongsan tam ha ka ‘Act East Policy’ jong ka India. Ka Geological Survey of India (GSI) ka la pyntreikam 108 tylli ki projek ha ka thain kiba iadei bad ki mar poh khyndew bapher bapher ha kine ki 5 snem ba la dep bad 23 tylli ki projek wad mar pohkhyndew ha ka thain ha kane ka samoi 2022-23.
Ka Sorkar ka la bei tyngka ruh ia ki projek lyngba ka National Mineral Exploration Trust (NMET), la ong u Joshi. Ar tylli ki projek wad mar pohkhyndewia u mawshun bad Iron ore ha Nagaland ki dei ba bei tyngka da ka NMET kiba la pyndep. Ka NMET ka ai jingiarap pisa ruh ia ka jingthied ia ki kor.
Ki tiar laboratory bad kiwei kiwei ia ki DGM ha ki jylla kaba kot haduh 10% jong ki projek wad mar poh khyndew ba la ai jingbit ha uwei u snem. La seng ia ka Joint Working Group da ka tnat par mar poh khyndew jong ka Sorkar Pdeng na ka bynta ki jylla bapher bapher ban pynbeit ia ki kam kiba iadei bad ka jingdie lilam.
U Joshi u la kularia ka thain ba kan don ka jingkyrshan na ka tnat Sorkar Pdeng lyngba ka GSI bad ba ka Indian Bureau of Mines (IBM) ka lah ban pynlong ia ki jingai jinghikai ia ki Geologist na ki jylla bad kiwei kiwei ki nongtrei khnang ban kham pyntbit ia ki. Ia kum kine ki prokram lah ban pynlong da ka GSI ha ka Shillong Centre jong ka lane ka GSITI ha Hyderabad katkum ka jingdonkam jong ki jylla.
Hynrei, u Pralhad Joshi u la pynsngew ruh ia ki jingartatien jong u shaphang ka rukom die lilam ha ka thain shateilammihngi bad u la kyntu ia ki Sorkar Jylla ba kin pynbeit ia ki kam kiba iadei bad ka jingdie lilam ha ki jylla ka thain shateilammihngi.
U la ong ba ka jingpynbiang ia ki mar bad ka jingdie lilam ia ki kan wanrah ia ka jingriewspah bad ka jingkyntiew ia ka jingioh khajna, ka jingplie lad ioh kam, ka jingwan ki karkhana bad kan ialam sha ka roi ka par jong ka thain. Ka jingdie lilamia ki block kan wanrah ruh ia kiwei kiwei ki tyllong jong ka pisa pilain sha ka thain.
Hadien, ha ka jingiakren bad ki lad pathai khubor, u Myntri Sorkar Pdeng u la ong ba ka Sorkar ka dang peit bniah kumno ka jingwad ia u dewiong bad ka umphniang kan ktah ia ka mariang bad u la kular ba ka jingtih ia ki mar poh khyndew kan iaid ha ka rukom kaba ai jingmyntoi ia ka thain.
U Sanjay Lohiya, Additional Secretary, ka tnat kam par mar poh khyndew u la ong ba kane ka tnat ka phaikhmat bha sha ka jingpynbun shuh shuh ia ka jingwad ia ki mar poh khyndew ha ka ri bad ka jingdie lilam ia ki block mar poh khyndew.
Ka GSI ka peit sani bha ia ka jingpyndep ia ka National Baseline Geoscience Data Generation prokram ha ka ri bad ka la kyntiew ia ka jingpeit ia ka jingwad ia ki mar poh khyndew ba kongsan ha ka thain shateilammihngi.
Dang shen, lai tylli ki projek kiba tam ia ka T. 10 klur ki dei ba la dep sanction na ka NMET sha ka jylla Assam. U la ong ba ka tnat kam par mar poh khyndew jong ka Sorkar Pdeng bad ki kynhun jong ka GSI, IBM, MECL kin ai jingkyrshan ia ki Sorkar Jylla. Da ka jingkyrmen, u Lohiya u la ong ruh ba kane ka jingialang kaniarap bha ban kyntiew ia ki kam par bad ki kam geology ha ka thain.
