Shillong, Kyllalyngkot 29: U bah Shangiansing Nongbri rangbah shnong jong ka kyndong Wahlang mynta ka sngi la ong ba ka jingweng ia u bah Overwell Lyngdoh kum u secretary jong ka VEC ka dei ka mon jong u paidbah namar ki kam jingleh jong u hi u la kynnoh kylla.
Haba kren ha ki lad pathai khubor mynta ka sngi ha Shillong Press Club u la ong ba ka dorbar shnong ha ka 12/08/2019 kala jied thymmai ia ki nongkitkam jong ka VEC bad la ioh ruh ia ka jingmynjur na ka ophis jong u BDO Sohiong Block.
Ka daw jong ka jingpyrshah ia u Bah Overwell ka dei ba ka rukom pynrung skhim na ka NERGS ka long shiliang, khamtam ha kaba ia dei bad ki sem syiar bad ki sem sniang ha kaba u la pynrung tang ia ki briew la jong la kynnoh kylla u rangbah shnong.
Haba ia dei bad ka jingpynrung ia ki Job Card kum ba la kynnoh la ong ba na ka liang jong ka shnong kala pynrung ia ki briew katkum ki kyndon namar ki don kiba duna dkhot met bad kiba dang mih iing thymmai. Halor ka jingiathoh kyrteng la ong ba ka dei ba ka kynhun u Bah Overwell kala ioh 71 bad na ka liang jong ki pat kila ioh 81.
Na ka liang jong u rangbah shnong u la ong ba ki don bun kiwei kiwei ki kam kiba u tei u rangbah u la leh ia kaba ki paidbah kin hun ia ka jingtrei kam jong u bad ha ka juh ka por la ong ba kim kwah ruh ban ia thad ia kaei kaba la jia hapoh shnong.
