Shillong, Naitung 03: Mynta ka sngi u myntri rangbah ka jylla Meghalaya u Conrad K Sangma haba plie ia ka jingialang ba shisien shisnem jong ka seng “Officers’ Association, North Eastern Circle, State Bank of India” ha U Soso Tham Auditorium la pynkynmaw ba ia ka Regional Ophis kaba don ha Kolkatta la wanrah sha Guwahati dei ha ka por jong u Purno A Sangma bam kwai ha dwar u blei.
Haba kren ha kane ka jingialang u Conrad la ong ba ka jingdon jong ki Bank ka long kaba don kam bha ha ki nongkyndong namar ia ki skhim sorkar la pyntrei lyngba ki Bank kiba dei ki jong ka sorkar jylla bad jong ka sorkar pdeng namar mynta ia ki skhim baroh la pyniaid lyngba ki bank.
U Myntri Rangbah la ong ba kum ka jylla la ia kynduh shibun ki jingeh namar ba ki duna ki bank sha ki nongkyndong ban pyntrei kam ia ki skhim jong ka sorkar, la ong ba ka jingdon ki Bank ka dei kawei ka bynta bad ka jingai jingshakri pat ka dei kawei ka bynta ia kaba don kam ban sngewthuh ban pyniapher bad ka jingdon jong ki ka long ban shakhri ia ki paidbah.
La kyntu ruh ia ka State Bank ba kan wanrah ia ka rukom trei kam kaba lah ban khring ia ki paidbah da ki rukom kiba thymmai ban ki dei ban don ia ka jingiaishah ban wanrah ia ka jinghun ia ki paidbah kiba dei ki nngkynshew pisa bad ki. Ki ophisar ki lah ban leh ia kane ba ki paidbah kin ai ka jingshaniah.
Ka State bank ka lah ban long kawei na ki bank ban paw ha ka pyrthei bad ki don ia ka lat ba ki lah ban leh, haba ia kren ia ki bynta kiba ka bank ka ia kynduh ka long ruh kaba don kam ban ia pynilang ia ki jingia aijingmut khnang ba ki Bank ba ioh ia ka jingithuh ka sorkar kin lah ban ia ryngkat bad ki Bank ba pyniaid da ki riew shimet.
Ka State Bank ka la don lypa ia ka kyrteng bad ki briew kiba trei ha ka, kiba la don ka jingshem phang, la ong ba ha North East don shibun ki bynta ban pynbha ia ka jingtrei kam da kaba ia treilang bad ki sorkar jylla , na ka liang jong ka sorkor Meghalaya kan ai ka jingkyrshan ban pynthikna ba ki shnong nongkyndong ruh kin don ia ki Bank, la ong u myntri rangbah.
