Shillong, Naitung 12: Ka kabinet kaba la ia shong pyrkhat kam mynta ka sngi kala pdiang ia ka “Meghalaya State Water Policy” bad kane kala pynlong ia ka jylla Meghalaya ba kan long ka jylla kaba nyngkong eh ha ka Ri India ban don ia la ka jong ka polisi ha kaba ia dei bad ka um.
Haba kren ha ki lad pathai khubor ha dien ba la wai ka jingialang jong ka kabinet , u Deputy Chief Minister u Bah Preston Tynsong u la iathuh ba da ka jingdon ia kane ka polisi mynta yn lah ban iaid sha khmat ha kaba ia dei bad ka jingpynneh pynsah ia ka um ka wah.
La iathuh ba ia kane ka polisi la pynwandur ha kata ka rukom ba kan don ka jingiatreilang bad ki paidbah namar ha kane ka jylla ka jaka ka dei ka jong u paidbah. laiathuh ba ha ki shnong yn thaw ia ka “Water Sanitation Water Committee”.
La iathuh ba kane ka polisi kala pruid dak lang ia ki tyllong um, ki wah, ki um kiba don hapoh khyndew kine ki long tang ki katto katne ki bynta kiba lah ban kdew hynrei ia kiba bun la thoh ha ka Polisi.
Ia kane ka polisi la pynkhreh da ka tnad Water Resources Department ryngkat ki riew shem phang bad ka jingthmu ka long ban iada ia ki um na ka bynta kane ka pateng mynta bad ki pateng ban dang wan.
