Shillong, K.Lyngkot 11: Ka Jylla Meghalaya kan rakhe ia ka 25th National Youth Festival ha ka 12 tarik Kyllalyngkot, 2022 ryngkat bad ka ri baroh kawei.
Ha nongbah Shillong, ka Ram Krishna Mission Vivekananda Cultural Centre kan pynlong ia ka prokram ha Ram Krishna Mission Vivekananda Cultural Centre Quinton Road, Shillong ha ryngkat ka jingiatreilang bad ka Nehru Yuva Kendra Sangathan, Meghalaya, Shillong naduh ka por 10:30 mynstep.
U Atul J. Nikam State Director NYKS, Meghalaya, Swami Hitakamananda, Secretary Ramkrishna Mission, Shillong bad u Swami Divyaswarupananda, Centre Incharge, Ram Krishna Mission Vivekananda Cultural Centre, Shillong kin iadonlang ha kane ka prokram.
U Myntri Rangbah duh jong ka ri, u Narendra Modi un plie ia ka 25th National Youth Festival ha ka 12 tarik Kyllalyngkot, 2022 ha ka por 11 baje mynstep ha Puducherry lyngba ka video conferencing. Ia ka National Youth Day la rakhe man ka snem ban kynmaw burom ia ka lyngkhuh sngi kha jong u Swami Vivekananda, u riewshemphang ba khraw.
Namar ka jinglong jingman ba iadei bad ka Covid, la pynbeit ban pynlong ia kane ka prokram lyngba ki bor internet naduh ka 12-13 tarik Kyllalyngkot, 2022. Hadien ka jingplie ia kane ka prokram yn pynlong ruh ia ka National Youth Summit kaba thmu ban khring, ban pynshitrhem, ban pyniatylli bad iashim bynta ki samla ha ka jingtei ia ka ri.
Ha kane ka summit, ki samla kin ioh ka lad ban pynpaw ia la ki jingsngew jong ki halor ki jingeh ba iadei bad ka Mariang, ka jingkylla ka suinbneng, ka roi ka par kaba iadei bad ki thong SDG, ka teknoloji, ka jingseng kam lajong bad ka jingsaindur thymmai, ka jingstad tynrai, ka jinglong jong ka ri, ka jingtei ia ka ri bad kiwei kiwei.
